ساحات وادي العلي - قصيدة نادرة على حرف الذال للأمير خالد الفيصل ورد السديري عليها

قصيدة نادرة على حرف الذال للأمير خالد الفيصل ورد السديري عليها

ياقلبي اللي من هوا البيض معتاذ
واليوم اشوف الوجد والشوق بـذه

حسبي على اللي للمواصيل جـذاذ
حبل المواصل بيننـا البعـد جـذه

يسقي منازل ليـن العـود رذراذ
يلقى بها ظبـي الطعاميـس لـذه

الصاحب الي عن هوى القلب مالاذ
لاقلت دوك القلـب يازيـن غـذه

ولانيب من هرجه كثيـر وهـذاذ
ماشاف في ليلـه نهـاره يهـذه

عساك تاتي لي يابو زيـد بانقـاذ
قلب تحذى الشور ياخـوك حـذه

رد محمد السديري

اسهر بطول الليل واغضي على الحاذ
وعن صديق القلـب مافيـه شـذه

شكواك خلت بسـرة القلـب تنحـاذ
ولاعاد في قلبي مـن الصبـر فـذه

اللي يابو بندر جعـل قلبـك افـلاذ
مشربك ياممـدوح الافعـال عـذه

طفلٍ سهم عينـه للاعمـاق نفـاذ
والحـق عليـك بقـذةّ عقـب قـذه

ان كان مالك فيـه مدخـل ومنفـاذ
له الشبك في مدهـل الصيـد بـذه

واليا دخل وسط الشبك يابن الافـذاذ
غوجك لساعـات المهمـات حـذه