|
ليتهم رقدوا؟
ندرت يوم بعد العصر الحلقه باشتري خضار دخلت الحلقه لأنها خاويه وشي ذاك الولد واقف معه ذاك الدفتر ياكبره تقل رياضيات سنه رابعه سالته خير وانا عمك وين اهل المحلات ماشوف حد والمحلات مفتوحه لايكون شي هزه ارضيه قال لا كل هذي المحلات مافيها الا عمال مخالفين قلت ايوه قال بنقّفل المحلات ونصادر البضاعه قلت وانت من بسلامتك قال انا موظف الامانه قلت كفو والله ماشاء الله عليك اجل كفشتموهم قال ايوه قلت والله انك ونعم ليتكم من زمان المهم مالقيت الا كم محل مفتوحه فيها سعوديين فيهم واحد اعرفه مريت عليه وخذت اغراضي من عنده قلت له وشب الرفاقه من صدقهم بيصكون المحلات وطردوا الهنود قال يقلونه قلت اجل والله تمام المهم رحت البيت اليوم الثاني نزلت قلت خلني امر الحلقه اشوف جيت الا والهنود كل واحد بمحله والبضاعه كما هي تلفت يمين يسار ماعندك احد مريت على صاحبي السعودي قلت وش العلم قال ماشي طلع صاحب المحلات نسيب مسئول بالامانه دق عليه قال له موظفكم قطع رزقنا خله يذلف عنا قلت ايوه وذلف قال ذلف وعودوا الهنود محلاتهم والموظف ماعاد شفناه شكلهم غرّموه قلت اجل ليتهم رقدوا قال ياعمي الدنيا سايبه هي جت عالحلقه؟
منقول من مقالات الكاتب الساخر( السيد غلط) موقع ومنتديات العقشان |
الهنود والبنقاله هذا رزقهم لأنهم يسعون في مناكبها وماتركوا لنا مناكب فأكلوا رزق وخلوا رزق بس عيالنا كسالى ونفوسهم كبيرة مايبغون يشتغلون بياعين في الحلقة عشان كلمة بيّاع عيب في حق الرجل منّا لذا فضّلوا مفردة شاري ويتمدحون بها أنا اشري ما ابيع من خارج الحدود لك التقدير على ماتنقله من مقالات السيد صحححح في الزمن الغلط دمت بخير |
وهي جت على الحلقة يا سيد غلط ماهي كل المحلات بجميع انواعها مافيها إلا عماله وبدون إقامات اقول ياسيد غلط ليتهم رقدوا |
ياسيد صحححححح بلانا من نفوسنا وهواميرنا واللي اعتبرهم عديمي الوطنية والانسانية يعطي الاجنبي المحل لياخذ نسبة اخر الشهر وهو نايم في العسل ... ومن له الحل والربط في الدوائر الحكومية سكتهم اما بسلطته او بما يدفع او او او وياليتها تبقى على الحلقة وبس ,,, والله المستعان |
. ***** يا سيد غلط نبه على صاحبك اللي في حلقة الخضار يمنع العماله الوافده من الغش في تعبئة كراتين الفاكهه والملاحظ ان المزارعين عماله وافدة والسواقين عماله وافده ولذلك البياعين اجانب والسعودي مدير عام بسطة الخضار والمشكا على الله تحياتي للسيد من خارج الحدود والسيد غلط ولمنتدى العقشان ***** |
ذكرتني احد شيبان ألديره من زمن غير بعيد شفته في الحلق يلمح في مصري يحرج على الجرجير ويقول 0 القرقير هنا يا بتاع القرقير 0 قال الشيبة 0 حسبي الله ونعم الوكيل حتى أنت 0 جيت تقرقر عندنا اهو لكم 0 الوقت للبنقاله والهنود 0 وسمعت أنهم في الطايف بيعملون إحصاء للمحلات التي فيها أجانب ووجدوها كلها 0 لأجانب 0 كلها لأجانب كلها لأجانب 0 والله يعوض علينا 0 شباب النت 0 ما يتنازلون يشتغلون وعيب احد يشوفهم وانحن اشتغلنا صبيان في البيوت 0 يعني 0 خدامات 0 وكنا نأخذ 0 بالقبقاب 0 والحمد لله ردينا الصاع صاعين لمن تعمد أهانتنا والانتقاص منا بالصبر وضعت يدك على كبد الحقيقة بارك الله فيك 00 |
قال انفخ يا شريم قال ما به برطم |
| الساعة الآن 01:41 AM. |
Powered by vBulletin® Version 3.8.7, Copyright ©2000 - 2024, Jelsoft Enterprises Ltd. TranZ By
Almuhajir