قررت أقطّع قيـد الافكـار لنـه


تزهِد ليا حبْسِت نفـوسً زهيـده


دام الجمال أغطاه والشعـر فنـه


أمنتـك الله يالافكـار العنـيـده


طيـف الخيـال بغيهـن وهقنـه


في ظرف نظره الف فكره جديده


روحً تبوح السـر .. روحً تكنـه


من كنته للبوح صـارت تِسْيـده


أما فهمت اللي ذكـرت ونسنـه


والا أكـرر ماتقـول وتعـيـده


لقيـت عـذرك للمواعيـد كنـه


يقـول ماكانـت وعّـوده أكيـده


مثل الجميـل اللـي تقفـاه مّنـه


حت الورق والريح صاح بجّريده


خيول فكـري قيدهـن حطمنـه


وبين الامل واليأس حطمت قيـده


أطلقـت زرقـن وبلهـن سيلنـه


مقسوم لي لو كان ماكنت أريـده


خانـن رمـوشً دمعهـن وقفنـه


ياصعب والله دمع خطو الوليـده


رجيتهـن مايرسلـن وأرسلـنـه


حتى غرق خدي بنـار الوقيـده


حسبي عليهـن بالعهـد خوننـه


وخانتني الدمعه وصارت أكيـده


لمحتها مـن فـوق رمـشً بلنـه


نظرات عبدً خان في عهد سيـده


آهات صدري والجروح الاسنـه


تزارقن صدري بغصـت وريـده


عزيـت خفـاقً همومـه حدنـه


وشح الامل وخان العضيد بعضيده


عزآه من جـور الليـال أبعّدنـه


يلين لو قلبـه سـوات الحديـده


لاصار ماهدومك جسدك أسترنـه


من عاد ترجي هم قلبـك يفيـده


وكلن على الثاني حسامـه يسّنـه


ملعون راعي التفرقـه والمكيـده


الاسئلـه وحلولـهـن دوّرنــه


وضاع الجواب بظل جمله مفيـده