البارحه ساهرٍ والدمع يجري = والقلب حزنن على فرقا حبيبه
كريم يابارق ينوض حدري = واللي سرى بالغداري يقتدي به
واللى ضرب وادين خلاه يجري = عسى طروش البوادي ترتوي به
متخفي لابس له بشت بدري = حسبي على البشت واللي غرني به
يامدمج الساق حالي منك مبري = بري النجاجير عيدانن صليبه
ابو قرون تغذى بالشمطري = مثل السفايف على كور النجيبه
ابو عيون الا دلت غزري = ترمي بالاسباب ويل اللي تصيبه
ابو خديد يشادي نجم فجري = والا القمر لا انتحا يبغي حبيبه
ابو نهيد كما الفنجال زبري = ويمزع الثوب من حال غصيبه
ياليتني عالم للغيب وادري = عن غض الا نهاد منهو من نصيبه
ياليتني حايف يقال خبري = انهب صخيف الحشا ثم اغدي به
من طاب لي طبت له والكل يدري = واللي يتغلى علينا وش نبيبه
ان مت حطوا بدرب البيض قبري = تكفون حطو على قلبي نصيبه
يامن يرد الحبيب وياخذ اجري = قفى بلا سبتن ربي حسيبه
ماقدر الله على المخلوق يجري = والعبد لزم ترى ياخذ نصيبه
وآ قو ماصابني وآ قو صبري = لعل ماصابني منه يصيبه
يالله طلباك يامغني كل فقري = كلن على قد حاله تعتني به