يقول صاحبي الدنيا تغيرت والاسعار فالعلالي وكل يوم ازمه وش رايك نسوي ازمه قلت كيف يعني قال ازمه زي ازمة الحديد والاسمنت والحين البيض قلت البيض ازمه قال ايوه يقولون الدجاج ماعاد يبيّض الا بالواسطه لي يومين ادور بيض مالقيت وصل الطبق 20ريال قلت منحن تجار عشان نخنق الناس قال الا معنا شي نقدر نسوي به ازمه قلت وشهو قال الغضاريف قلت الغضاريف كيف قال نسري على لوز الناس ونجتنيه وندسه وماناهب فالسوق منه الا شويه وشوف الناس لاتخابطوا فوقه حتى اللي مامعه سنون عشان انحن شعب يحب يصف سرى في كل شي وحتى مسؤلينا ينبسطون من الزحمه ويفرحون لاشافوا الناس محتاجين وحد خانقهم قلت وبعدين قال بعدين لاشفنا الناس غزلت عالغضاريف وارتفع سعرها حملنا ونيتك كراتين وبسطنا به وخليناهم يصفون سرى عندنا وبعنا بالسعر اللي نحب قلت طيب ولاحد اشتكى ومسكونا قلت ارقد ماحد عندك لوبيمسكونا كان مسكوا اللي قبلنا الدينا خربانه وماحد عندك قلت تقولها قال اقولها بس زهب كشافك وكراتينك والليله امر عليك لارقدوا الناس قلت طيب ماهو حرام قال واللي يسوونه فينا ماهو حرام لي شهر ادور 10 قطم سمنت مالقيت كل ماجيت عند سياره وصفيت سرى مايصلني لين يبيح تقل الناس ماتاكل الا سمنت قلت طيب ولا يبست الغضاريف قبل نبيعها قال بسيطه نسوي ازمة لباب بلدي لاتخاف كل ازمه عندنا لها ازمه انا صح والا غلط؟

منقول من مقالات الكاتب الساخر(السيدغلط) موقع ومنتديات العقشان