ساحات وادي العلي - ليـــــــــــــش مستغرب ..؟

ليش مستغرب وتزعل يوم ادوّر عند غيرك
"قلب واحساس ومشاعر " صرت فاقدها معك

لا تحاسبني .. وحاسب نفسك.. وحكّم ضميرك
لو أجدْها معْك .. ماني ْمدوّر .. الاّ باتبعك

كنت أقول: الحب يوم انّه رماني في مسيرك
نفسه اللي فيك ضيّعني .. وفيني ضيّعك

والقليل اللي أحسّه منْك.. يغني عن كثيرك
صرت ماحسّه.. كأنّي لو أجوعك ما اشبعك

قلت: اثيرك .. كيف؟ مدري.. المهم انّي أثيرك
قمت اسوّي كل ما يرضيك.. حتى أقنعك

والبلى ما نلْت ياخي منْك .. فيّك أو هجيرك
موقعك.. مهما أسوّي معك.. نفسه موقعك

غامض احساس وبليد ْمن اوّلك حتى أخيرك
ما تحسّسني ْبوجودي .. ما كأنّي مطمعك

صرت اشكّ اصلاً بأنّي كنت في لحظه عشيرك
ومثل هذا الشك .. مابه شكّ .. والله يمنعك

ضقت .. حتى ما بقالي غير اجيك وأستشيرك
كيف تبغاني أسولف فيك .. اشوفك .. أسمعك !!

حسّ فيني شويّ .. تكفى .. شوفني كيف استجيرك
حاول انّك تثبت انّي ساكنٍ بين اضلعك

أعطني من بعض ما أعطيك .. تلقاني أسيرك
خلني أقصى طموحك .. وإنت أشّر بإصبعك

آآآه لو أقدر أعيرك بعض احاسيسي.. لاعيرك
والله ان ينزف نزيف الدمّ - لجلي - مدمعك

يمكن انّك لو تعيش الجرح تعرف قدْر طيرك
تعرف اللي لو وجعته .. مايفكّر يوجعك

لجل ذلك ما اقدر آجاملْك .. واستحمل نكيرك
فوق هذا.. ما اسمح لنفسي أخونك واخدعك

باتركك .. وان كنت بابقى رغم فرقانا ضريرك
وانت خلّ اهمالك لشخصي .. وشغلك ينفعك

دام ربّي ماكتب يجمع مصيري مع مصيرك
يقطع الله سيرة الحب ورجاه .. ويقطعك

ناوي ارحل وانت ماقصرت بي .. مكثور خيرك
وادْع بالتوفيق لي .. مادمت جاي اودّعك

لو معك قلب وتبيني.. مارحلت لحدّ غيرك
كيف معك اقضي حياتي .. وانت قلبك مو معك

ممــــا راق لــ ع ــذبة .. دمتـــم™ ~..