ياراكب ثنتين يشدن الاقواس = من دار ريضان الحجر حركني
مافوقهن ياكود الدويرع وجلاس = وسفايفٍ بين أربعه يلعبني
تحركن من عندنا حين اللإدماس = ومضى سواد الليل مابركني
حطن علم عذفاء يسارٍ من الراس = والظهر من ورد الحفر يشربني
حطوا لهن مع هثلة البدو بلاس = عن الحضر واللي بالخلا يسرحني
وإليا لفيتوا عند مدقوق الألعاس = الجادل اللي بالمحبه محني
قولوا على حبل الرجا نطوي الياس = والبيض غيره كلهن يحرمني
لو يندوي جرحي دويته بزفواس = وابني لباب البيت منكنم ومني
والله يعلم بالخطايا والاوجاس = حب مضى من صغـر سنك وسني
مريت دارٍ ماتقل جته الاوناس = وونيت ودموع العيون اذرفني
جيت المراح اللي به العشب محتاس = عشبٍ على مضرب وساده معني
محذا سماد النار ومشاقة الراس = وثلاث لا يبكن ولا ينبكني
لي بنت عمٍ ماوطت درب الادناس = ولا دنست يوم النسا يدنسني
ضربتها وانا احسب الضرب نوماس = وطلقتها يوم افخت العقل مني
ياناس كيف العين تبكي علـى ناس = وكيف العيون بلا رمد يسهرني
لو ينشكي حبه على الطير قرناس = اضحى الضحى بمويكره مستكني
ولو ينشكي حبه على قب الافراس = عين نهار الكون لايفزعني
ولوينشكي حبه على ذيب الاخماس = يسرح مع الطليان مايجفلني
ولو ينشكي حبه على الميت ما ناس = يثور من بيـن النصايب يوني
ولو البيوت مشددينه بالأمراس = عين مع الخفرات لا ينبنني
ولوان غوطه وام سنمان وضراس = يدرن مابقلبي لقلبه بكني
تلقى سهل جبه هضابٍ و منحاس = وحتى الجبل بالقاع صار متثني
وحتى النجوم اللي مع الليل غلاس = لوينشكي حبه لهن وقفني
اشرفت راس ضراس من فوق الاطعاس = ولا لوم طراد الهوى لو يجني
هليت دمع العين واوميت بالراس = ورافقت كور العيس ياما ابعدني
وابعدت نفسي عن شقا كل وسواس = البعد خيرٍ من حياة التمني
وياعم ياللي طعت بي هرج الأنجاس = طاوعت هرج الناس واخلفت ضني
اطعت بي ياعم دايس ودرباس = عوارض صدقتها وابعدني
من لاخذا من درس الاسلاف نبراس = تمضي حياته بالرجا والتمني
واقفيت ادير بضامري كل هوجاس = على وليف بالحشا غاب عني
تكبي خواطرهم اليا جيت عساس = ماتقل انا منهم ولاصار مني
انا زبون الحرد للخيل مدباس = ياكلشـن شهب الشـوارب نخني
نفسي تشوم عن التدبلح مع الساس = ولاعاش منهو عـن خصيمه يكني
لو صرت انا المقلاع ماشلت الاضراس = والموس مايقطع بليا مسني
يا صار ماربعك على الراي جلاس = وجنحان طيران السعد يلفحني
تصير دومن للرجاجيل مدواس = مثل اللذي يسمع صفير المغني
وانا احمد اللي خالق كل الاجناس = واعطى وساع القاع مافيه مني
دارٍ بدار ولامناحاة الانجاس = لاصار مايمناك عينك تزني
في بلدة الغراف من جملة الناس = ولاني بمن يرجي الفطايس تحني
دار بها الاجواد لولابها الحاس = دايم تذكرني ليالٍ مضني