ماتقبلت الفراق ومال يدي فيه حيله = آه .. لو أن الظروف المقبله تكشف قدرها
لو يعرف الشخص منا وش مع الغيب بيجيله = كان جنبنا المشاكل من قبل يوقع ضررها
ما هقيت الليله اللي جابت الفرقا طويله = لين صارت ليلة أمس بعيني أطول من شهرها
والعذاب اللي يذوب بعين من يفقد خليله = عندي أكبر من عذاب العين لو تفقد نظرها
والحبيب اللي صدوده مثل مداته جزيله = صد عني وأعرفه لا صد عن حاجه هجرها
كأن روحي يوم حست في جفاه وصعب نيله = بشرتني بالضياع وشدت العزم لسفرها
ما رحمها من هلاك وما تقبلها دخيله = تحتضر قدام عينه لين ماتت من قهرها
عاد ليت اللي ذبحها وأرهب الموت بوسيله = ما دفن وجه الضحيه والسكاكين بنحرها
ليت قلبه يوم طاوع فعلته كمّل جميله = لو غسلها من عروقه وبكفن صدره قبرها
من حفر بضلوع قلبه حفرة تكفي قتيله = ليه ما يدفن قتيله بالضلوع اللي حفرها
اشتكيته لرفوف وللبراويز الهزيله = وانذعرت من النياح اللي سمعته في صورها
رحت أسولف للجبال الصم عن قصة رحيله = ما تركت متونها إلا ينحت الدمع بصخرها
واحد حقق جماله كذب أساطير ألف ليله = يسكن السبع البحور ويحبس الحور بدررها
الدروب بكبرياها ترتجف تحته ذليله = والورود اللي تقبل خطوته تنبت بأثرها
والغصون إليا بغاها تنثنيله .. تنثنيله = والفياض إن حب ينثر عطرها يلمس ظهرها
لو يصوت للغدير المنجرف جفف سبيله = وإن تبسم للجبال الصامته نَطّق حجرها
كل حاجه تستويله لو بغاها تستويله = بالنظر واستغفر الله لو بأقول أنه سحرها
ذاك لو بس يتمنى فاكهه شجره ظليله = بس يفتح راحت إيده ويتساقط له ثمرها
كأن ربي سخر له المعجزات المستحيله = وأصبح اسطورة وكل الألسنه تنقل خبرها
هان محجر عيني لين جفف سلسبيله = وألتفت لأخير دمعه قبلت يده ونثرها
دمعة كأن بشقاها يوم طاحت في شليله = جادل جات بدوي تطلب الستر وسترها
له عليّ أنه ليامن طاح من عيني تشيله = ولي عليه أنه يرجع لإبتساماتي ثغرها
لو طعوني بالسكاكين بيده تشفي غليله = لأشتريها من عذابي وأدفع بدمي مهرها
وأطلبه ينهال فيني طعن لين يطيح حيله = بس لا يترك عيوني تنحرم نعمة بصرها
له بعيني مثل ما للطهر بالنفس الأصيله = تقطع يدين الردى لو مس شعره من شعرها
ما بغيته غير درب وشتت أقدام الدليله = مزنة ما بللتني واستحيت أطلب مطرها
والعطايا من يدين الخلق للطالب قليله = والوهايب من يد الله للعباد جل ورها
وإن نسيت إني زرعت العشق وحضوضي بخيله = ما نسيت إن العطايا تستحق اللي شكرها
صعب تلقى شخص وافي يجزي الطيب بمثيله = والعرب قد قالوا أن الناس ما خلت قشرها

.
.
.

[table1="width:95%;"]