والله اغسل جفونك بالوصال وبالمودّه = يالعيون اللي تناثر دمعها الطاهر عشاني
والله ان ارفع لك الميثاق في قلبي واعدّه = بالضمير وبالخفوق ان كان ما قاله لساني
انّك اقرب من حيا وجه الشلي باطراف خدّه = وانك ابعد للجفا من ثورة الجبو الهداني
الوفا لك عرش غارات الليالي ما تهدّه = والمحبة راسيه مرسى السفينه في المواني
اسمعيني يا ملاذ اللي مقاديره تحدّه = ياهواي اللّي ماعرف غيرك من البيض الغواني
يمكن اتعب .. يمكن ادْله .. يمكن ابعد عنك مدّه = وانتي انتي .. مثل ما انتي ساكنه باعلى كياني
شيخةٍ متسلطنه في عرش قلبي مستبدّه = قصرها صدري وغرفة نومها تحت المحاني
ترقد وصفّ الجنود اللي ( هنيّا ) مستعدّه = ساعة بساعه خفاره كنّها في حجز جاني
والغلا ضابط ذليل وفيه خوف وفيه شدّه = ما يخليها تروح من الصدر لو هي ثواني
اركزي خنجر غلاك وشقي ضلوعي بحدّه = وادري انك حاكمه عرش الغرام البرلماني
والله انه ما يحوشك بالصدر ضيقه وشدّه = عهد مني ..عهد مني واشهد اشهد يازماني