حياك الله يابو فارس
موضوعك وطرحك رائع بس لا يخرج عن مسارة نخليها سهرات زي زمان سوالف وقصص من الماضي
لا تنس التونه وساردين احمر طويل ,, والمنقة وتين البيعلامة .... وريال البيبسي من فوق السطح ..
وانا اعطيك سالفة ( كيس العيش )
وجبة دسمة في سهرة على انغام الموسيقى وعجعجة دخان السجاير
الزمن في احدى ليالي الصيف
المكان فندق خمسة نجوم بمنتجع الرهوه
المشاركون : فرقة حسب الله ........ لا تعليق
بعد ما ينام كل شيبة مع كهلته بعد العشاء بساعة تبدأ السهرة في ======= سوالف
على ضوء القمر و صوت طلال ومحمد عبده وام كلثوم ....يا مسهرني ودخان كنت ابيض طويل وفي آخر الليل اشتغل الجوع عشى يالله بالخير بعد المغرب لا يسمن ولا يغني من جوع قردة في فريقة , والي تعشى كداد عيش وحقينة والي دغبوس ودجر ... كل واحد يصيح الجوع ذبحني ... المهم اخونا طير شلوى الله يطول عمره قال ابشروا ونط على مطبخ الفندق المعزبة في آخر الحوش ولع الطباخة وحط كفكيرة الشاهي ودقايق والرجال جاي بذاك الطشت فيه كفكيرة سوداء إلى اليوم ماندري وش لونها الاساسي مليانه شاهي وفناجيل عقال فيصل الي مشتوف راسة والي مكسورة عروته المهم حطها بيننا وقال ذلحين اجيكم راح وفتح باب (شقير) ابحثوا في القاموس عن معناها - جنب البيت بشويش لا تسمعه أمه أثره سويت حق البقرة وجانا يسحب كيس كبير حق رز مدري سكر وزقابه بيننا . اش هذا يا طيرنا المبجل قال هذي شابوره .
قبل ما اقول اش في الكيس أقول لكم من وين جاء الكيس . والد طيرنا مجاود كعادة الآباء في ذلك الزمن - يرحمهم الله ويجزاهم عنا كل خير - في مكة ويشتري اكياس بقايا خبز من المطاعم ويرسلها مع احد المسافرين للديره لام عياله الله يمتعها بالصحة والعافية. وهي يوم بعد يوم تاخذ شوي من الكيس وتلينه في حلًة من العصر وفي الليل تحطها فوق القبس وتحركها مع شوية ملح الين تذوب وبعدين تبردها !!! وتقدمها آخر الليل للبقرة طبق بالهنا والشفا عشان تدر لها حليب. هذي قصة الكيس .
الربع قربوا الكيس وبالرحمن وانت وحظك ادخل ايدك في الكيس تخرج بوصلة تميس وإلا صامولي وإلا شريك انفض الغبار وامسح العشب الأخضر منها وغمس في الشاهي وأرسل وجبه متكاملة والله ما أحلاها من أكله – الجوع أبخص- بعدها يكثرون بالخير ويرد طيرنا الكيس مكانه قبل ما تقوم أمه يجيله علقة واحنا ما يغلق علي بن قسقس - الله يرحمه - أذانه للفجر إلا وكل واحد في فراشه قبل ما يجي أبوه يصحيه للصلاة لو ما يلقاه أندبغ ذاك اليوم الين يقوم حمار بطنه ...
وسلامتكم