كلمات عزه وافتخار أعجبتني لصاحبة البوح
تتعب ويتعب من يجاريك طغيان
باللي تفتش في دروبي لزله
دوِّر بمجهر سخِّر الأنس والجان
مالك سوى الخيبة وزورٍ تدِلّه
بي ضعف إنسانة ولي عثرة إنسان
في كل أمر إلا الدروب المخلة
دايم على قولي والأفعال ميزان
ترجح بكفه كل عثرة وخِلة
أمشي على وضح النقي امشي سلطان
مثل الجبل ما يخفضه دوس ظله
وأخفض جناحي من محبة وإيمان
وإن مِسَّت العزة فللــه وللــه
عندي كرامة تهزم أقلوب فرسان
هيهات تهزمني الدعاوي المضلة
بنت الرجال اللي لهم كلمه وشان
واللي لهم بالدين منهج ومِله
متميزين بعلم مع حلم وإحسان
رضيعهم تلقى به اللي تجله
أفخر بهم ,وأمشي على نور الإيمان
أترك حرام الدين وأعمل بحله
لي عين فأقدامي ودربي بها بان
ولي عقل في عيني ولا أحدنٍ يضله
ولي غايةٍ فوق المكايد والإضغان
منها يفت الغدر روحٍ تسله
واللي عجز لا ياصل لشم الأغصان
قال الثمر حامض ودمعه يهلّه
والشمس ما تحجب بمنديل شيطان
وما تنكر العين الضيا دون عله
قولي به الإنصاف والحق برهان
يجف به حلقٍ وحلقٍ يبله
واللي يبي لي ذل خسران خسران
يرجع حسير الطرف خاسي بذله