.
*****
ما به جديد
تركي الأسمري
كل الوجوه بلوحة الذكرى تشابه
حتى أنا مثلي أنا
أخرج من المألوف وادخل فالرتابه
والحبيب اللي جرحني
ما جرحني لين علمني بضمير
كيف اقطف يانع الجمر من سدرة غيابه
واحرث عيوني مواسم للخريف
وكلما شفت الفرح أبيض مثل ذيك السحابه
ابتسم واقول صدقني سحابة صيف
كوّنها بخار الدمع من بحر الكآبه
ما به جديد
الأسئله شذت عن الفطره
والسما تمطر بفكره
والخيال الخصب ينبت أرضها
والإجابه بكر فالعشرين
تشهق بارتعاشه
مبروك يانار الشرور
هذي هي ماتت على شانك فراشه
ما به جديد
العيد
شباك السنه الموصود
وخلفه صبايا والف عطر وشال
متى تجي وتفتح لهم
يا سيدهم شوال
ما به جديد
ملتقى الاسمنت والجدران
يا ذيك الزوايا
بس أحيانا تكوني
منفى للإنسان أو مرمى هدايا
ما به جديد
من رتب حروف الهجا
ما فيه خير
من جلس الهمزه هناك
ورحل اليا للأخير
ما فيه خير
لا نويت تناجي ربك قلت: يـا
ولا بغيت تنادي خلك قلت: يـا
ولا طغيت وصرت تملك كل حاجه احتجت يـا
شفت ياخي وش كثر حنا اوفيــــا
ما به جديد
يا وطن هذي جروحي
قوم غن
والله مــ اخونك يا ارضي
حتى لو بعتيني بابخس ثمن
هجري ضلوعي قرى
ابني من دمي مدن
نصفي لك وقت الرخا
كلي لك وقت المحن
ما به جديد
*****