صاحبي يلبس البرقع ما هي عادة له = مير اخذ سلم جيرانه وصارت طبيعه
مثل من قال لاجيت الوطن خذ دله = اتبع الناس وان ماطاعك الوقت طيعه
هيه ياللي مكلفكم على برقع له = وسعو قرضته ترى عيونه وسيعه
فصلو له حرير ناعم ما يمله = حيث بشرة خدوده بالتأثر سريعه
صاحبي لاهرج تشفق على هرجتله = من حلاوة كلامه كن هرجه يبيعه
ويوم اشوف المحاجر والرموش المظله = وعاتقن كنه رقبة الغزال الرفيعه
يا صلاة النبي وش جمع الزين كله = لو بحليه كنه بالاصايل طليعه
كامل زينه الصافي وهي تستغله = بالعقل والانوثه والمحاسن فظيعه
عيني الي على شوفه ودود مغله = ما غفى جفنها تمسي وتصبح فجيعه