مدري بصراحه وش اللي فيك يجذبني
صمتك .. هدوءك .. شموخك أو معاناتك
في كل صفحة غلا ألقاك تكتبني
وأصير أنا لغز حاير بين أبياتك
إن جيت يمك عطش بالحب تشربني
ليلٍ سهرته يذكرني بنجماتك
إن قلت أببعد سِحر عينك يقرّبني
عمري ابتدأ بين نبضاتك ونظراتك
تدري شعورك فرح أو حزن يعجبني
بعثرتني بين بسماتك ودمعاتك
فرقاك فيها دموع العين تغلبني
يا ليتني غيمةٍ واعشق مسافاتك
وامطر على درب قلبك يا مذوبني
واصير غصنٍ حياته دون لمساتك
أهجر .. تغلى .. بكيفك .. صد .. شيّبني
أصلا شبابي عرفته بعد لحظاتك
وتصدق إني لمحتك يوم تسلبني
لكن تركتك .. عجبني نوع سرقاتك
ناي الهوى صار وسط الروح يطربني
صوّرت ذاتي سفينة .. في بحر ذاتك
لك في ضلوعي يدين الشوق تحطبني
يروق جو المسا مع طيب نسماتك
ما ودي اكذب .. خفوقي فيك تعّبني
مدري وش اسمي غرامي في حكاياتك؟
إن كان هذا عذاب .. أرجوك عذبني
وان كان حبي غلط .. يا زين غلطاتك
مما لامس مشاعر اسير