والله اني كنت ألوم اللي يضيق إن غاب خله = لين جربت المحبه والفراق وقلت توبه
لعنبو جد المفارق فيه هم وفيه ذله = أثر كل الحب لذه والفراق أكبر عيوبه
امس فارقت الغلا ومفارق الخلان عله = والعلاج الوصل لاتبلش طبيب ولاحبوبه
الزعل هو سبه الفرقا يهز الحب كله = ليتني طولت بالي قبل لايعلن غروبه
وآهني اللي وسيع الصدر صدره وسع فله = غلطه الصاحب تجي وتروح ماهي بمحسوبه
عارف قدره وقدر اللي يحبه فى محله = ذاك نفسه لاحشا ماهي على الحب مغصوبه
ليش تحسب غلطه الصاحب على الصاحب مذله = ليش ماتحسب ميانه لو تجي عشرين نوبه
لاوربي كنت أحبه حيل مادورت زله = لاتشكك في غلاه ولاتساعد في هروبه
لايمي قبلك تعبت ألوم شعار المجله = وكنت مؤمن فى مقوله اعذب الشعر الكذوبه
وأثر كلن فى حياته له تجارب مستقله = وانت لاتشره على مثلي وتبلا لك بحوبه
كان جابتك الحميه روح له تكفى وقله = لايخليني واذا وده يخفف من ذنوبه
يستخير وله غلا قلب صدوق مايمله = فدوة له كل قلبي من شماله لجنوبه
يوم قفى والخفوق يفوح عقبه فوح دله = وسط وقدره واحد عز الشتا والسهر دوبه
لاتقهوى بارده من برد فنجاله وزله = ثم قربها على جال الجمر وأرهى شبوبه
وين يدله هالخفوق وكل مايدله يتله = طاري اللي ياكثر ماتعّبت رجلي فى دروبه
لاطرى جريت ونه من بلاده مستحله = مثل ماراحت بلادي مع شعارات العروبه
كل هاجوس يجيبه جعل شعري فدوة له = واعذابي كل ماجبت لي الجبله هبوبه
مشغلن قلبي يحبه دون خلق الله من الله = هيه ياللي ممتلكني حسن وأسلوب وعذوبه
ماسمعت ان الخوي له بالخوي تسعين زله = وانت طوف زلتي ياعل تفداك اللعوبه
صاحبي سيف الهجر لاصرت تقدر لاتسله = ماتظن ان العفو عند المقدره اكبر عقوبه
ايه انا كنت ألوم اللي يضيق ان غاب خله = لين جربت المحبه والفراق وقلت توبه

.
.
.
.

[table1="width:95%;"]