ليته يغطّي لوعة العاشق الثوب
للإمير خالد الفيصل
قالوا لي: إلعب,قلت: مانيب لاعوب
إلا مزوح عند صافي الجبيني
ألاعبه وافرح إلى صرت مغلوب
واشوف وجهه لى غلبني يزيني
واطرب على ضحكه وهو حيل مطروب
وانادمه في لحظة أحلى سنيني
حبيبي اللي كل مافيه محبوب
ترخص له الدنيا وما كان فيني
اللي يجيني كل ماغاب لاهوب
أونس حرارة لاهبه في كنيني
وكنّي على غيره من الناس مغصوب
وكن العمر ياقف بليّا ضنيني
واصير بين يدين الايام مقضوب
والليل يجلد بالسهر موق عيني
يضحك بي الشامت إذا قلت:ماتوب
ويحزن صديق العمر مما يجيني
ليته يغطّي لوعة العاشق الثوب
والا عيوني ماتبيّن حنيني
وان كان تعذيب المحبين مكتوب
على عذاب الحب ربي يعيني