الصاحب اللي شد واقفت مطاياه
ومايدري انه حط بجوفي حرايق
أكبر دليل ان الجفا منه ما أقواه
أموت وأحيا في غيابه دقايق
واللي تحبه حيل يا شين فرقاه
جربتها وعندي عليها وثايق
يجزاني الله لو نوى القلب ينساه
ماغيره بعيني من الناس لايق
ماقد خبرنا الطير يزهد بمرباه
الا اذا ماهو له الجو رايق
الشاهد الله صاحبي همي أرضاه
ماقد جرحته وش بلاه أمتضايق؟
يالوعتي..يا حسرتي .. ويش دنياه؟
خوفي عليه .. امغيرين الحقايق
الامر لله- قدّر البعد واقصاه
يالله عساها ما تزود العوايق
سعد الخريجي