.
*****
الجرح العميق
للشاعر: زياد بن حجاب
غلطه قديمه وانتهت لكن بقا الجرح العميق
اللي يبي يبقى على مر الليالي مالتئم
آسف لأني ما قدرت اصبر وغيرت الطريق
وآسف لأني ما قدرت افهَم اللي ما فهم
بركت للحمل الثقيل وطقت لو ماكنت اطيق
من شان لا قالوا زياد يقال والله والنعم
لكن نعم مفعولها ما ياصل يدين الغريق
اللي لمد ايديه للي ما يطيقونه سئم
ولا عاد يسوى في عيونه لا زفير ولا شهيق
شيئ يجي تقفاه منه يقطعه لو هو نسم
مسرح جريمة قصتي اكثر غموض من الحريق
اللي تضيع به الدلائل والقرائن والتهم
مافيه امر من الصديق ليا تنكر للصديق
ولا فيه بالدنيا اهم من المهم الا الاهم
الياصرت بالحالك فريق وفيه قدامك فريق
وتخاف بكره لانهزمت يقال مسكين انهزم
خذلك طريـق تظمن انه بالنهاية ما يضيق
وان طعت شوري خذ طريق الله ترى مابه ندم
وانا استخرت الله وعيني خايلت قمة طويق
القمه اللي فوقها رفرف للأمجاد العلم
والله لعانق راسها ما دامني حر طليق
حر اليامنه شلع من سرعته مثل السهم
ماعادت احلامي على خبرك ترى خبرك عتيق
وان شفت بعيونك هرم حلمي على راس الهرم
لي مده احلامي من العالي على الجزله تويق
صافحت كف المستحيل وقـال: مد ام الشحم
انا برئ من أي حلم يلبس ثياب الرقيق
ان ما امتطى صهوة جواد العز بالله واعتصم
*****