للترف خيل ٍ غدا مركاضهـا... صـدري
وطيور شوقـي غـدا مقيالهـا .. عيونـه
لبـا جفونـه ولبـا .. طبعهـا الخـدري
ولبا سوادٍ رقد .. فـي خـدري جفونـه
اثـره بضحكـة سنونـه حافـر ٍ قبـري
ولا كنت اظني باموت بضحكـة سنونـه
شرهـة متونـه علـى شلالهـا الخمـري
وان نثرتـه الهبـوب .. مـردّه متـونـه
جيت اجبر الكسر لكنه .. كسـر جبـري
مجنـون والحـظ ساقـه يــم مجنـونـه
يتفنـن بلوعتـي .. واتفنـن بصـبـري
حتى غـدت لوعتـي مـن اجمـل فنونـه
لا رحم ابوالحظ ساق الهجر مـن بـدري
وشيّد جسور الجفـا مـن دونـي ودونـه
واقفيت لاني ضريـر .. ولانـي ببصـري
اليـا منعنـي الحيـا ... ساقتنـي المونـه
وجهمت اسوق الخطا في الدرب واهـذري
تكفـون ياللـي خـذوا خلّـي تردونـه
ابطى .. وخلّى سـؤال ٍ يلهـث بفكـري
مادري يصون الغلا ؟ .. مادري هو يخونه؟
ويوم اني اسـجّ بيـن ادري .. ومـا ادري
عقب البطا .. جاء يقول : الدار وشلونـه
قلت انت : دارك هنا.. وأشٍّر على (صدري)
قال انت : دارك هنا .. وأشًّرْ على (عيونه)