ياهاجسي خذلك من البن فنجال
علّـك تجيـب... النايفات ...العـذاري
سولف معي ويحلها الف حلال
وأطرب على صوت الحطب بالوجاري
ياهاجسي زلزل على كل زلزال
النار.. تبـدأ من صغـار الـشـراري..
ما كل رجالنّ بها الوقت رجال
ولا كل رجآلـن على الطيب ضاري..
أحدن يقول الطيب للجدّ والخـال
وأحـدن بطيـبه كـل مخـلوق داري..
أحدن بنى في قمة المجد منزال
وأحدن بنى بـيته علـى جـرف هاري ..
أحدن بكفه مرتوي عذب وزلال
وأحدن هماج القـوم فـي دمـه ساري..
أحدن بطيبه مكتسي بشت وعقال
وأحدن من سلوم الرياجيل عاري ..
أحدن يجي طاريه في كل موال
وأحدن يموت ولا يـجي فـيه طـاري..
ماكل من يهبط مع الناس جمّال
ولا كل من ياقف على البـيع شاري..
الصاحب اللي مايجي طيب الفال
وياقف معـك لا من حـدتـك الطواري..
لن ماوقف بالنفس والجهد والمال
جعـله عشا للجـايعـات الضـواري..
ماله مع اهل الطيب مخرج ومدخال
وما هو من اللي ينطحـون الغـداري.
يهـوى كثيـر القـيل ويـزود القـال
ولن جـاء يميني قـلت عـود يسـاري.
الوقـت هـذا بـين طـيب وبـطّــال
الذيـب يعـوي والجـعاري جعـاري..
اهـوال في الدنيا وياكثر الاهـوال
لاصار وكر الصقـر عـش القمـاري ..
بعض الكلام اصعب من الموت قـتّال
يقـتل كـما تقتل طعـون الشبـاري ..
راقت لي وحبيت انقلها لكم