قصة قصيده لبندر بن سرور جدأ رائعه

نبدأ القصه ..

الشاعر المعروف بندر بن سرور العتيبي رحمه الله شاعر فحل وتحفظه كتب التاريخ للابد
كان بندر في حياته مشاغبا ومزعجا للسلطات في المملكة اثناء حكم الملك فيصل حيث كان يهرب البضائع من الكويت ليكسب من خلال ارباحها لاختلاف السعر في ذلك الوقت ..
وكان أمير المنطقة الشرقية سعود بن جلوي غاضباً من بندر حيث قبض عليه اكثر من مره ويخرجه أمير عتيبة تركي بن ربيعان امير الفوج التاسع بالحرس الوطني وهو من شيوخ قبيلة عتيبة اللي لهم كلمة عند الملك والحكومة وكان ياخذون تعهد على بندر بعدم التهريب الا انه مطنشهم ولا يسمع الكلام ..
المهم وصل للامير بن جلوي ان بندر هرب بضاعه ولا قدروا يمسكونه فحلف بن جلوي ان يقتل بندر اذا قبض عليه ومعروف عن بن جلوي قسوته وشدته وجبروته اثناء حكمه للمنطقة الشرقية .. ووصل لبندر كلام الأمير وتهديده بس ما ارتدع ..
وفي يوم وبعد المغرب بشوي كان بندر نازل مع النفود بسيارته الونيت وتفاجأ ان حرس الحدود مخيمين اسفل النفود وأيقن انه مقبوض عليه لا محاله فهو لا يستطيع العودة لأن النفود عالي وإذا نزل معناها مسكوه فأوقف السيارة وترجل منها ورجع على أقدامه وصادف سيارة وركب معاه وطلب منه يوصله لبيت الشيخ تركي ووصل له حوالي الساعة وحده بالليل وقام يطق الباب بقوه والليل هادىء وصحى كل اللي بالبيت وراحت بنت الشيخ تفتح الباب وبندر يطق الباب بقوه وفتحت الباب وقال لها ابوها من اللي عند الباب يا بنت قالت خويك بندر المرجوج( وسمعها بندر وهي تصفه بالمرجوج )

وبعد دخوله قال لها هالابيات مباشرةً

يا سخيف الذرعان مانيب مرجوج = رجتني الدنيا بغدر وحيله
والله يالولا اللي على تاسع الفوج = لأكب نجد وعزوةً بالقبيله
لا شك حاديني على نجد هيدوج = مسقى الفيافي لين يدرج مسيله
تركي ليا من الليالي غدن عـوج = يشيل حملِ ما تشيله قبيله
يرسى كما مينا البواخر على الموج = ومنين ماصك البحر يرتكي له
مادام تركي حي ماودي ادوج = وان غاب غـبت من الرجوم الطـويله

عرف الشيخ تركي من الأبيات ان بندر في مشكلة ويبي الفزعة وأبتسم الشيخ وقال أبشر يا بندر وش طلبك وأخبره بما حدث وأنه خايف ينمسك ويبيه يشفع له عند ابن جلوي قال له أبشر يا بندر وركب بندر مع الشيخ تركي بسيارة الشيخ وراحوا للدمام ووصلوا لقصر الأمير بعد صلاة الفجر بدقايق وكان الامير سعود بن جلوي متعود كل يوم بعد الفجر يجلس بالمجلس يتقهوى ويسمع صفحتين من كتاب الحديث فأوقف الشيخ تركي سيارته مقابل المجلس بس بعيد وكان الوقت لا زال ظلام ونزل لوحده وسلم على الامير وجلس بجانبه ولما صب المقهوي الفنجال للشيخ تركي انزله على الأرض فالتفت عليه بن جلوي وقال وش فيك نزلت الفنجال قال تركي لي طلب قال اشرب فنجالك واللي تطلبه جاك فشرب تركي الفنجال وقال طلبه وزعل بن جلوي وقال والله لو اني داري انك جاي علشان بن سرور كان ما عطيتك طلبك وأنت تدري اني غاضب منه لكن دامك شربت الفنجال فطلبك جاك .

هذه هي القصه وللأمانه هناك روايات كثيره لها تختلف اختلافات بسيطه عن ماسبق حتى ان الابيات نفسها لها اكثر من صياغه ولكن حاولت قدر الامكان ان اتحرى الاصح والاصدق منها ...

 

 

.

*****

حيا الله أبو ميس

الشاعر بندر بن سرور الروقي العتيبي له عدد كبير من القصائد ومنها

يالله يا جال الأمور المهمة = تجلى وهق قلب برى حال راعيه
البر دجته و البحر رحت يمّه = أدرج سبب حظ على الله مساعيه
يوم إن ولد اللاش رزقه على أمه = رزقي على اللي ميّت القشع يحييه
ماني وانا بندر ببياع دمه = يقطعك يا بيّاع دمّه و مهفيه
اللي يبيّع لابسات الأزمه = ثور يبي بيض العماهيج تغنيه
يزعل ليا جت ليلة الدول يمّه = يرضى بسوق المال بأخيه و أبيه
خطو البخيل اللي يكبّر معمه = يقرا الكتاب و واجب الله مخليه
أما هرج له في رفيقه بنمّه = والا عطا و أمه تضيّع هقاويه
يا مل قلب كل ما مات همّه = دارت دواليب الدهر لين تحييه
فرّاق شمل الناس عيّا يلمه = وقتن يشيب الراس من شاية فيه
أحدن ينام و حط راسه بكمه = و أحد تخم النوم عينه و تخطيه
و أحدن يحاول بالردى بنت عمه = و أحدن يحاول ستر عذرا عوانيه
تخالف الأنظار شرقن و يمّه = كلٍ هدف رايه من الناس مرضيه
أنشدك ياللي كل شي تتمه = تقرا الكتاب كل فرض تصليّه
ويش القليب اللي عميق مجمّه = ما سرّ غرسه ماه عطشى سوانيه
سم السبب يا عارفن عنه سمه = سم السبب يا عارفه قبل اسميه

تحياتي أبو ميس على حسن الاختيار

*****

 

 

مساءالورد اباتوفيق شرفتني بمرورك اري انه من الواجب علينا تصليط الضوء علي كل مبدع وبندربن سرور احد اهم المبدعين دمت بود

 

 

مع شكري وتقديري لحسن اختيارك 0 ولان ابو توفيق 0 بارك الله فيه يثري كل طرح 0 أزيدك هذه القصيدة لبندر رحمه الله مع تحياتي 00

سر يا قلم مالي على الصبر طاقه
صبري تعدى الحد ماعاد ينطاق
أكتب لمثلي قصته واشتياقه
في خطك الواضح على بيض الأوراق
قصة حزين صافي الحر ذاقه
انا بذكره ما صله خاطري ضاق
باقو به الأصحاب والوقت باقة
وصار الضحية بين باير وبواق
يمشي وهو ما حس في كسر ساقه
امشي على ساقين وأصبح على ساق
هذي سوات الوقت شين اصطفاقه
الوقت لو يصفى لك أيام دراق
لاشك يا من معك عقل ولباقة
بنصحك كان انك للأمثال تشتاق
صادق رجال يعرفون ألصداقه
يقفون صفك يوم يبسات الأرياق
ومن يرغب فراقك فعجل فراقه
جاز الذي يجزيك أفراق بفراق
يقوله اللي جاير الوقت عاقه
ولازال في غيبوبة الهم ما فاق
حظه على أقشر شي للنفس ساقه
بقبور الإحياء ينتظر يوم الإطلاق