عولمة !!

عولمة



يابو بدر جاني جوابن منك لحنه حزنوي

انا اشهد انه يالخوي صاب الفؤاد وزلزلا

أبدعت في وصف البشر وصفاً جميلاً ماغوي

ياشاعراً رام العلا حتى تربع واعتلا

البيض تغشى راسك اللي ماحنيته لانسوي

إلا لربك خالقه رب السماوات العلا

نصيحتي ياصاحبي خلك لربك مرضوي

احفظ صلاتك تحفظك ويزول همك والبلا

هذا زمان العولمه وقت انديجاني ودهلوي

ماهو زمانك يالأبي يالحر ياذيب الفلا

هذا زمان الخنفسه وهرج اللسان الملتوي

ولبس المخصر والقصير والجنز ياكاف البلا

ولّى زمان القبيله في وقتنا تطوى طوي

ماعاد تسمع مرحبا بالضيف يامية هلا

مكانها حلت هلو وشكراً غدت مرسي أوي

عقب المفطح والندي جاك الدجاج مفلفلا

والبورده والنومسه والجود والنجر يعوي

والضيف وعلوم العرب والطيب من زود الغلا

صارت تخلف عندهم في ذا الزمان الفوضوي

ولا عاد تعرف وجهتك بين الهنود وبنقلا

ماعاد به إلا الصبر اصبر وخلك منزوي

وادع الكريم يحلها والله يعين المبتلا

في ديرتك انت الغريب رغم انك مواطن سوي

ومكانك يحل الغريب اللي تمكن واعتلا

أخذ البطاقه وارتسم كنه مهرج بهلوي

وجاب ربعه كلهم صاروا له اعوان وكلا

واخذ الوظائف كلها ومالك وظيفه يابدوي

نبغى مع الخبره لغه واكبر شهاده وكفلا

ينافسون ابن البد صاروا له منافس قوي

فالسوق وعلوم الشرا صاروا زبائن واعملا

أخذوا الصداره بكل شي وصار الغريب الأولوي

العذر لك يابن البلد لوسرت عكس عن الملا

الهم طاعون القلوب والوضع جداً مأسوي

وش باقي ان كان وصلت جوع الصغار الجهلا

غنوا لحون السعوده وطبولها تدوي دوي

والحظ قفلها بشيش والسعوده راحت جلا

عشنا الأمل فاحلامنا وآمالنا تهوي هوي

وفكو لنا باب القروض الدين والسجن امتلا

واللي كسر ظهر البعير نار الغلا تكوي كوي

مابين سندان الفقر أو تحت مطرقة الغلا

والله ماخونك يابلد لو كان يشووني شوي

والخاتمه لا تنحني عيش بشرف والا فلا


للشاعر / خالد حمود الثقفي

 

 

.

*****

قصيدة معبرة مع الاسف عن واقع

شكراً مشرف عام3 على النقل

*****

 

 

سلمت أبا توفيق

فعلا القصيدة عبرت عن واقع مجتمعي مؤلم

دمت بخير وعافية