اقفى أبوي وما خذا مني علوم

اقفى أبوي وما خذا مني علوم = ما قلت له فرقاك حزن وهضايم
اشلون أبدله واشتهي لذة النوم = وانته بوسط القلب توقد ضرايم
تغيب لك شمس وتظهر لك غيوم = ما غير افكّر فيك جالس وقايم
سبعة شهور مرّت وكني اليوم = أدري بموتك واضرب الدرب هايم
كم مرة ببكيك والنوح مذموم = كافي يا أعزّ الناس لا تموت دايم
آمنت بالله كل ما صار مقسوم = والحمد لله مات ساجد وصايم
وأستغفر الله كثر ما قيل مرحوم = والشاهد الله كل علمه غنايم