انت خبلي

ندرت السوق وكل ماوصلت عند اشاره الا عندها صور لناس وش الهرجه ياولد سألت واحد من الربع وش تالصور ياشيخ لايكون هذولا مطلوبين قال والله انك مهرقل قلت اجل وش تالصور وتالمخيمات واللمبات لايكون شي معزاه قال لاياشيبه انت وين عايش قلت فالعقشان قال هذولا حقين الانتخابات قلت وشنهم ذولي قال هذولا اللي شعارهم (انت خبلي) قلت ايش والله ماخبل الا انته قال لا هذا شعارهم انتخب لي قلت يعني ايش قال يعني انتخبه عشان يصير في المجلس البلدي قلت وشنهو المجلس البلدي قال حق الانتخابات قلت وشنهي الانتخابات قال حقت المجلس البلدي قلت فقعت عيوني اجيبك شمال تردها يمين قال هذا اللي اعرفه تعال نروح نسألهم قلت فين قال نمر على واحد من المخيمات ونشوف رحنا لقينا الربع متسدحين تحت ذيك الخيام والقهوه عامره قلنا سلام يالربع قالوا حياكم اقلطوا قلطنا قالوا هلا والله تبغون تنتخبون قلنا ايوه قالوا هلا ومراحب عزالله وصلتم المكان المناسب قلنا طيب وش الهرجه قالوا هذا هو مرشحكم انتخبوه عشان يصير عضو بالمجلس قلت طيب انت وش تستفد لاانتخبتك وانا وش استفيد لاانتخبتك قال انا مااستفيد شي وانت تستفيد مني قلت كيف قال باوصل صوتك للمسؤلين قلت بس بسيطه انا باصيح ويسمعوني قال لا قلت هاه قال كل طلباتك تتحقق قلت ياسلام انا مالي الا طلبين قال وشهي قلت تقبلون البنت فالجامعه وتوظفون الولد حك خشمه قال والله ياعم هذي لك عليها كل الناس تبغى نفس طلبك ومانقدر عليهم كلهم المح لغيرها قلت زي ايش يعني قال يعني وصلة سفلت لمبة شارع محروقه مقبره نصورها برميل حق زباله نبطحه عند البيت قلت وكل هذي الصور والهيلمه والمخيمات عشان تبطح لي برميل عند البيت بطحوك وبطحوا من ينتخبك المره الاوله انتخبوهم وش سووا خذوا المكافأت وانحن وش خذنا انا صح والا غلط؟

(منقول من مقالات الكاتب الساخر السيدغلط منتديات العقشان)