/
ياراكبً من فوق صهوة تويتار
زرقا/ بمقياس الفضا/ تقطع البيد
لك اشتعال النار/ لا قالو النار
ولك امتداد الريح/ فوق الاخاديد
عليك خلق الله يردون الاخبار
ياما اكثر اخبارك / وكثر المناقيد
مدارك العالم على النت تنهار
وكلٍ على كيفه يشكل تغاريد
تغريدة ً ..!غريّدها كبر العار
وتغريدة ً ..!غريدها قدم العيد
ناس ً كبار وغردوا /صاروا صغار
وناسً لهم مع الكباير مواعيد
نبغي نجدد بالثقافه والافكار
وعقولنا بالقيد / تستعذب القيد
مادامت(قلوب العرب)صخرواحجار
لاشي ينفع بالقلوب الجلاميد
ماعاد به نقش ًعلى صخرة الغار
ولاعاد به علم ً به العالم تفيد
لو كانت التغريده / بربع دولار
ماكان وصلتنا تغاريد ابو زيد
هذا الزمن ..!ماهومرايه لما صار
هذا الزمن ..! ماهو مدايح وتمجيد
ولاهو زمن ثوره/ وثاير /وثوار
ولاهو زمن عابد/ وعبّاد /وعبيد
هذا زمن تحرير (مضمون الافكار)
هذا زمن تفـكير من غير تحديد
يرقى به اللي حطـ للفكر مضمــار
ويشقى به اللي يحفظ الهرج ويعيد
هذا زمان الطايره /دون طيار
ولى زمان النافعي / والبواريد
واحنا نلوم الوقت / ونحط تذكار
ونقلد اشكال الحضارات تقليد
نسرف في التبرير/ ونقدم اعذار
وافلاسنا ماهوب محتاج تاكيد
نشري حطبنا / من دكاكين تجار
وعلى منازلنا نشِب المواقيد
نلغي مراحل من تفاصيل الاعمار
ونزرع شتات / ولاتدلّت عناقيد
ماترفع الدنيا / بتدبير سمسار
ولايجيب الصيد من يجهل الصيد
الوقت كم مرر لنا (لفت الانظار)
لكن نعقــِّد (لفت الانظار ) تعقيد
الشر حول الدار /والشر بالدار
ياللي تقول الشر عن (داري) بعيد..!
خايف يجي باكر ونزهد بالاعمــار
وننسى (ثياب العيد) في ليلة العيد
وخايف نغرد كلنا فوق الاخطار
ونقول (تباُ..! يازمان التغاريد)