من القـــــــــلب

.
.

أبكتب لك مـع أبياتي كلام مشفرٍ تشفير = لعلك تفهم المعنى ورمزٍ صاغه لساني
أنا اللي عاشقه خلٍ عشق غيري بلا تقدير = تمنيته وهو ناسي وأحسب أنه تمناني
سقاني كاس بيدينه طلع كاس الهوى تخدير = أحسب إني مالكٍ قلبه وهو مع واحدٍ ثاني
أنا نفسي على الذل تعاف الزين لو هو غير = وبدوس قلبي برجلي لو فكّر إنه يتحداني
تبي تدري وش القصه وش المعنى والتفسير = وش اللي سهّر عيوني وخلى النوم ماجاني
وش اللي كسّر الخاطر كسورٍ مالها تجبير = وش اللي أرخص دموعي بجوف الليل وبكاني
برسل لك مع أبياتي علاماتٍ بهن تبصير = بوصفلك معالم جرح ينزف بوسط وجداني
أبرسم لك شظايـا خافقٍ متكسرٍ تكسير = وبنظم لك قوافي شعر فيها قصة أحزاني
وبكتب قصتي معها عذر وأرفع لك التقرير = أنا المظلوم لكني بمفهومك أنا الجاني
أنا شفتك على دربي ومن أجلك عكست السير = وأنا مـدري وش اللي يم ذاك الدرب وداني
لمحت اسمك مثل نجمٍ على نوره يطير الطير = وأنا من يوم شفت اسمك فرحت وجيتلك عاني
تقابلنا أنا وأنت على صفحه بها تسطير = تهلي بي من أولها وبآخر سطر تجفاني
لقيتك تنتظر غيري .. حقيقـه مابها تزوير = وأنا اللي كنت أظن إنك على الصفحه تحراني
تعيش الحلم مع صوره على التصغير والتكبير = تعزي قلبك العاشق وفيك القلب عزاني
سبحت بداخل أعماقك وغصـت بغبة التفكير = ولاتحسـب هواجيسك مع اللي راح تخفاني
حملت المسك بيميني وباليسرى نفخت الكير = تداوي جرحٍ بقلبي وتفتق جرحٍ أشقاني
بخفي جرحك الدامي وبدفن سرنا بالبير = وبنثر ذكرياتك شعر للهاجس تغشاني
وإذا تذكرت في يوم أبذكر عشرتك بالخير = وبدعيلك إذا هب الجنوب وهيض أشجاني
عسى دومٍ معك يمشي رفيق وبدربك التيسير = وأنا ما أضيع من بعدك ولي ربٍ تولاني
أنا ياصاحبي برحل وسامحني على التقصير = أنا نفسي تعاف الزين إذا ماكان يبغاني
وتبي أفرز لك المعنى على الصافي بلا تكثير = واسّبِك صافي المعنى بقالب بيت وحداني
خلاص الوقت علمني حفظت الدرس بالتكرير = نصيحه لاتجي وإن جيت ماظنيت تلقاني

.
.
.
.
.
.
.
.
.
.
.
.