مجموعة قصائد الأمير خالد الفيصل ( دايم السيف )

فدوة عيونك

فدوة عيونك لـــــــــــــو غدت روح مغليك=وش عاد لـــــــــــــو راحت لعينك عشاير
ابيع مــــــــا يغلى على الكون و اشريك=و اسوق لَـــــــــى جتني علومك بشاير
و ازعّل جميع الناس بــــالحيل و ارضيك=و اصبر ولو دارت علَيّ الـــــــــــــــــدّواير
و آخذ من ايّامي لك ايــــــــــام واعطيك=وان راح عمـــــــــري لك فلا هو خساير
احب انا شوفك و صوتك و طــــــــــاريك=دايم وفكري فيك هـــــــــــــــــايم وحاير
بالصمت اهوجس بك و بالصوت اناديك=و الله عليم البيّنـــــــــــــــــــه والسّراير
انـــــــــــــا و قلبي و الهوى بين اياديك=عنـــــــــــــــــدك مفاتيح الهنا للضماير
مــــن روحي احبك ومن روحي افديك=يــــــــــــامن غرامه و الحسن فيه ثاير

 

 

نوى القلب

نوى القلب نيـــــــــــــــــه ما نواها لاحد غيرك=نوى القلب يمشي لك على السمع والطاعة
مع الشك والغيره وهجــــــــــــــــــرك وتقصيرك=أحبك واقول أمرك لــــــــــــــــــــه الروح خضاعه
جمعنا طريق الحب وانور بتنويـــــــــــــــــــــرك=على صدفة لقلوب الأحباب جماعــــــــــــــــه
ملكني هواك وقادني بامر تدبيـــــــــــــــــــرك=أمانه معك روحي من البعـــــــــــــــــد ملتاعه
تغزلت بك والشعر من بعض تعبيـــــــــــــــــرك=كلامك سحر يخلف موازين سماعـــــــــــــــه
تقول الغزل مني شغل كـــــــــــــــــل تفكيرك=عسى واعسى والنفس بـــــــــالزود طماعه

 

 

مرتاح أحبك

مرتاح احبك ولا علمت=حتى انت عييت ابين لك
والبارحة يوم أنا سلمت=شكيت لو عيني تدلك
برق لمع بالعيون وخفت=مواجع القلب توصل لك
عساك في ناظري ما شفت=كيف المعاليق يومن لك
من خوفتي لا احترق جنبت=هربت من شمسك لظلك
أخشى عليـك الهوى لو طحت=ما تلني يمك يتلك
أبي قليلك ولا حصلت=بعضك تركني مع كلك
ما ادري صواب او خطا ما قلت=إنك حبيبي وانا خلك

 

 

تدلل علينا

تدلل علينا يا سمي الظبي وش عاد = تدلل ولك بامر الهوى شــــــافع عندي
ولك في خيال الشاعر المهتوي ميعاد = ومجلس على غيمة وليلة قمر نجدي
اسافر معك لبلاد وانزل معك في بـلاد = ومن غيمه لغيمه ولا للسما حـــــــــد
رسمتك ضحوك الفجر يا فرحة الأعياد = ولمعة شعاع ينغمس في نــــدى ورد
وغنيت بــك صوت لقلب الهوى ميلاد = ونغمة غــــــرام ذاب في لحنها وجدي
أشوفك مطر هتان لا برق ولا رعـــــاد = من الوسم يبعث بالصحاري زهر ودي
أحبك وصل وبعاد أحبك رضــــــا وعناد = ولا يختـــلف وعدي ولا ينتقض عهدي