"يسعـد صبـاحــكــ "

.

"يسعد صباحك"






يسعد صباحك ياحبيبي حالي طيب..

كل شي مثل اللي كان...المدامع..والمواجع..والأمان اللي اختفى لحظة غيابك..

والليالي اللي مضت..مثل الليالي اللي مضت..

الهم عازف.. والدمع نازف.. والعمر في غيبتك حاير وخايف..

حتى جراحك وسط قلبي مثل ماهي..

وفي شفاهي باقي نفس الكلام اللي بقى آخر لقى..

مثل ما انت ياحبيب الروح شايف..كل شي مثل اللي كان وحالي طيب..


.. يسعد صباحك ياحبيبي ..


هذا انت... كل ماضاقت بي الدنيا تغيب ..

وكل ماضاقت بك الدنيا تجيني ..

هذا انت... إن كساك الهم صرت أوفى حبيب ..

وإن نساك الهم تتياهى بأنيني ..

مثل ما انت ..دايم تجي في وقتك حبيبي بعد ماوقتك يروح..

يا آخر دموعي وشجوني ..وأول إحساسي جروح..

مابقى بي من عذابي ياحبيبي إلا انت

وهذا انت ياحبيب الروح شايف..كل شي مثل اللي كان وحالي طيب..

.. يسعد صباحك ياحبيبي ..



هذا ضي الصبح.. أو هو بعض نورك ..

هذا همس الورد.. أو دافي شعورك ..

من هو مثلك في غرورك....

جيت متأكد بسامح.. راسم الطيبه ملامح ..

ماهو بدري...؟

انت تدري..ماقتلني غيابك أكثر من حضورك..

ايه كان العمر داكن..ايه كان الهم ساكن وقتي بعدك..

بس أنا ياضي عمري..كنت عودت الأماكن تألف بعادك وصدك..

.. ياللي مايرضيني ضعفك...

مدري أنثر فوق كتفك أغلى دمعي.... أو .. أردك...؟؟






لـــ عبدالرحمن بن مساعـد


.

,