ذكريات ومن هنا وهناك (الجزء الأول)

تستورك معاك يا نزهة المشتاق ، على امل في المزيد من هذه الذكريات الجميلة النابعة من المجتمع المكي الاصيل والجميل .
من اهداف هذه الزاوية جلب المتعة والفائدة للقارئ الكريم والقارئة الكريمة وتسليط الضوء على الماضي وعاداته وتقاليده وذكرياته ولتكون بمثابة نافذة يطل منها الجيل الحاضر على تلك الحقبة الزمنية الماضية بخيرها وشرها بايجابياتها وسلبياتها .
ويحرص كتاب هذه الزاوية على التنويع حتى لا يمل من يمر من هنا بل يجد المتعة والفائدة .
ولهذا اتمنى من الجميع المشاركة وعدم الاكتفاء بالقراءة ، ولكل من يكتب الحرية في اختيار الاسلوب الذي يراه سواء بلهجة ام بلغة عربية فصحى او بمزيج من ذلك ، ولا تقتصر على الذكريات بل تشمل القصص والمواقف الطريفة والمواقف الصعبة وادعو الجميع أن يتكرموا علينا بالمشاركة لا عدمناكم جميعا .
شكرا يا نزهة المشتاق على ما تفضلت به وننتظر المزيد كما اسلفت ولك خالص تحياتي وتقديري .

 

 

الحلقة الثانية عشرة

أمثال حجازية

كان أهل الحجاز بصفة عامة وسكان مكة بصفة خاصة لهم أمثال منها ماهو خاص بهم ومنها ما اكتسبوه من بمعاشرتهم للوافدين من مختلف الأمم عند قدومهم للحج بحكم المعاشرة لهم حيث تجد الكثير من شباب مكة اللذين لهم علاقة بخدمة الحجاج أو من يعملون بالتجارة يجيدون العديد من اللغات مثل الأردية والإندونيسية والتركية والإيرانية والهندية والهوساوية وغيرها من اللغات التي يتحدث بها الحجاج القادمين للحج والعمرة واليكم بعض هذه الأمثال الدارجة بمكة :ــ

إذا جيت رايح كتر من الفضايح أو إذا جيت رايح كتر من الملايح *****

بعد ما أكل واتكأ قال ريحته مستكا ******
حاجه ما تهمك وصي عليها جوز أمك ******
ست وجاريتين على قلي بيضتين ******
أعمى ويلضم خرز ******
دلع الكبار زي الشقدف على الحمار ..... يضرب هذا المثل لخروج العجوز عن وقاره وجديته******
والشقدف هوما كان وضع على الجمل ليجلس فيه المسافرون *****
اللي ماله أم حاله يغم. ******
كنس بيتك ورشُه ما تدري مين يخشوا ******
الخايبه تتعلق بالحبال الدايبه ******
أهري وانكتي يا جاره وأنا ثابته زي العمارة ******
شايل لنا طيران عبد القادر ******
لو لك شي عند الكلب قول له يا سيدي ******
لا تقرصيني يا نحله وما أبغالك عسل ******
يحسدوا الفقير على موتة الجمعه ******
سكتنا له دخل بحمارو *******
ما قدروا على الحمار قدرو على البردعة ******
إذا حلقوا لغيرك بل راسك واستني ******
ايش عرف الحمير بأكل الجنزبيل ******
البيض الفاسد يدردب على بعضه ******
إذا تعاندوا الحمير يا بخت الركابه ******
البيضه ما تداقش حجر ******
حبيبك يمضغ لك الزلط وعدوك يعد لك الغلط ******
حمارتك العرجة تغنيك عن سؤال اللئيم ******
داخل لبيت العروسه نادر من بيت العريس *******
ياريتني بيضه وعرجه اصلوا البياض فرجه(بضم الفا) ******
ياماخد القرد على ماله يروح المال ويبقى القرد على حالو ******
الله من محبته في عبيدو جعل العمر والرزق بيدو ******
اللي يشوفني بعين اشوفو باتنين ******
مين شايفك يالي في الظلام تغمز ******
على قد زيتوا سرجلو ******
ما تعرف خيري لين ما تجرب غيري ******
عقربه في الغار ولا ضُرة في الدار ******
فقير أتجوز فقيرة خلفوا وجع القلب ******
كبيرهم فلفل وصغيرهم زنجبيل واللي في الكوفلة يقول من العايدين **
خاتم بفصو وكل شيء ترصوا ******
خشوني لاتنسوني ولعوا الشمعة وشوفوني ******
عميه تحفف مجنونة وتقولها حواجبك سودا ومقرونة ******
الصرمة والقبقاب صاروا أصحاب ******
يا داق المويه في المهراس يا مربي وليد الناس ******
كل عيش البخيل ولا تأكل عيش المنان ******
أدب ولدك وان زعلت أمه ******
يابخت من بكاني وبكى الناس عليه ولا من ضحكني وضحك الناس عليه*****
رضينا بالهم والهم ما رضي بينا ******
ديل الكلب عمرو ماينعدل ولو حطوه في قالب ******
أتملت العدوه وقلت المرؤه ******
أكلوا الملوخية وصاروا أفندية ******
لمن كنا ما كانوا ولمن رقدنا قاموا ******
قالوا متى طلعت القصر قالوا أمس العصر ******
العروسه للعريس والجري للمتاعيس ******
سلامتك والهيل والقرنفل قمامتك ******
اللي يشيل قربه مخروقه تنقط على رأسه******
الحجر من الأرض والدم من راسك******
أخوانك من أمك زي الدهب في كمك و أخوانك من أبوك زي القوم لما ينهبوك ******
من بيت أصقع لبيت أرقع ******
من جرف لدحديره ياقلب لاتحزن *******
مطبق العاده ولا معصوب يوم ******
في كل محضر بالتوب الأخضر******
في كل محضر وله منبر *******
باب الزقاق يقول لباب السطوح .. اللي يجي يجي .. واللي يروح يروح **
خليها في القلب تجرح و لا تندربره ترمح******
الحر من غمزه والحمار من رفزه يضرب هذا المثل لإيضاح الفرق بين النبيه والبليد.* *****
حمار الحكومة حكومة يضرب هذا المثل للموظف الصغير المتسلط على الناس******
خطبوها أتعززت تركوها أتندمت يضرب لمن يتظاهر بعدم الرغبة حينما يعرض عليه أمر ولكنه يندم بعد فوات الأوان ******
كل حبه مسوسه لها كيال اعور ******
قلبي على ولدي انفطر وقلب ولدي عليا حجر ******
أرضى بقردك لايجيك اللي أقرد منوو******
الحب عياقة ...توب بلا ياقة ******

بيت العيلة
في بيت العيلة كان في سطوح
وفَسَحة حلوة تِرُد الروح
ياما تلمِينَا فيها بصفا نية وقلب مَشْروح
قَليلَنا كان يكيفنا لُقمة حِلوة وهنية
وقِية جُبنه تِعَشينا وفَتُوتَة وحَبة مَقْلية
وغدانا كان المُتْيَسِر أي مُعَرَق ورُز وخلاص
وأمي تكسر وتجبر عشان نجيب لحمةْ راس
ونِحمد ربنا عالموجود ونُشكر فضله على النعمة
ومع انُ الخير كان محدود بس كلِ حاجة كانت طِعْمَة
وكانت نفسنا قَنْعَانة رغم الحرمان والقِلة
وكانت عيننا مليانة وكُنا مُخَلينَهَا فَلْه
الفَرْش حَنبل وخِزانة مع كِدَه كنا بِنتسَلَى
والمُوجِب كان الفاصل عُرْف سائد بين الناس
وماهُو مكتوب الحاصِل لافي دفتر ولا قُرطَاس
بسْ ناس كانت تجمعنا فيها عَيْب ومايِسِير وفَضِيحة
وكل حَركة ولها معنى وسِمة بين حِلوة وقَبيحة
وفي العَصْرِية ياسلام الله يُرُدْ لنا أيام
هادي تِكَنِس في الدُرجان وهَادي تِنَظف عَفْش البيت
إِسْتِيَتة عليها القهوة الحِلوة وأمي تقلي كُرُوبو في زيت
وأمَا عَمة تِلاقِيها بِتْسَوِي لَنا في الشُرْ بِيت
وجدة..الله يرحم جدة كانت فِعلا سَلْوَتْنَا
كانت زَيْ أجمل وردة مِين في الكُون زَيْ جدتنا
كانت في البِيت هي النَجدة ويَاما وَرَى ظَهْرها دَسَتْنَا
وتِقْرَع أبويَا وتِرُدُو بِغَضَبها لو ِانو ضَربْنَا
ومِن يَدهَا كُنا بِنِتْغَدَى ويَاما ويَاما حَكَتنَا
أحْلى حِكَايات في الدنيا هي حِكَايات جَدتنَا
كانت تِصْحَى من النَسْمة قبل ما يَفِجَ النُور
عَشان تِحَضِر لنا لُقمَة وتِجْمعنَا على تِبْسِي فطُور
وتِصَبِحْنا بِدي الكِلمة يِجْعَل يومَك هنا وسُرور
وتِصَحي أبويَا وتِقُولوا قوم يا ضَنايَا الغَالي ياعُمري
صَلي رَكعَة وسِيب النوم
وابدأ علَى رِزقك اجرِي
أنا أدري اِنو الرِزق مَقْسُوم بسْ البَركة من بَدري
كَان يُوم زمان مَلْيَان نَشاطْ وفَاعِلية وحَركة
ويُوم يِبدأ بالقرآن لابُد يِتَملى بَركَة
وتَعالو نُشُوف كيف كانُو مِن يوم النَاس ماتِصبح
الوَاحِد يفتَح دُكَانة يافَتاح ويِسبِح
وأَول مايُهز مِيزَانُه ولو بِقَرْش يِسْتَربح
يقولَك خلاص أنا ِاستَفتحتْ رُوح خَلِي جَاري يِسْتفَتح
تِجي مثلا للفَوال وشَايِل معاك الِزبدِية
تِبْغَى فول بِرُبْع رِيال وتُقولوه اِتوصَى فيَا
تِلاقي جَنبك رِجال ياخُدهَا يِمَلِيلُو هيَا
بِنَفس القِيمة ورَاس المال ويِزيدو السَمنة هدية
تِقولوا لِيه ياعَمِ جَلال تِدِيلُو كَتير وأنا شُوية
يُرد عَلِيك بِأَحلَى مَقَال تِسْمَعُو كِدَه عَالصُبْحِية
َياولدي هَادا أبو عِيَال وقَليلَة عِندُو الَمادية
دا راجِل مَسْتور الحال وعِيالُه يِمَلوا التََكِية
والواحِد لو حَالوا مَالْ َلازِم يِحِس باَلأخوية
كلام حِكَم كلام أَمثَال وأَلْسِنَة حِلوَة وطَريَة
والحَقِيقة تُرَاثَنا عَظيم شِئ واِقع مَلْمُوس
ماهُو بس كُومة بَرْسِيم ولاَرُوشَان ولا فَانوس
تُراثنا عَلَشان نِحصِيه مايِكَفِيه أَلفين قَامُوس..

 

 

متعك الله بالصحة والعافية يا ابا حاتم مثلما متعتنا بهذه الامثال الحجازية الجميلة .
لكن ما تلاحظ انك كررت قصيدة بيت سيدي رغم اني كتبتها في مداخلة معك سابقة ؟ والا من باب في الاعادة افادة ؟ .
ما عليك فداك يا ابا حاتم .
لك خالص شكري وتقديري وتقبل خالص تحياتي يا جاري العزيز .

 

 

الحبيبان ابو ياسر صاحب هذه الزاويه وابو حاتم من يتحفنا بذكرياته المكاويه شكرا لكما ثم هل يلحظ الجميع
مدى خفت دم فى كلام وامثال وتعامل اهل مكه الحلوين واسمحوا لى ان اضيف بعض الامثال

جوز امى اقله ياعمى
خدى الاصيل ولو على الحصير
عيش بديرة فسد ولا تعيش بديرة حسد
اعط العيش خبازه ولو اكل نصة
ما لقيت فى الورد عيب قلت يا احمر الخدين
الف سبه ما تشق توب
عقله زى الكيلون كلمه توديه كلمه تجيبه
البسه من عجلتها جابت بزورتها عمى
ما يعجبك العجب ولا الصيام فى رجب

 

 

المشاركة الأصلية كتبت بواسطة حازم

الحبيبان ابو ياسر صاحب هذه الزاويه وابو حاتم من يتحفنا بذكرياته المكاويه شكرا لكما ثم هل يلحظ الجميع
مدى خفت دم فى كلام وامثال وتعامل اهل مكه الحلوين واسمحوا لى ان اضيف بعض الامثال

جوز امى اقله ياعمى
خدى الاصيل ولو على الحصير
عيش بديرة فسد ولا تعيش بديرة حسد
اعط العيش خبازه ولو اكل نصة
ما لقيت فى الورد عيب قلت يا احمر الخدين
الف سبه ما تشق توب
عقله زى الكيلون كلمه توديه كلمه تجيبه
البسه من عجلتها جابت بزورتها عمى
ما يعجبك العجب ولا الصيام فى رجب

بل الشكر لك يا حازم على مرورك على هذه الزاوية ومشاركتك الجميلة جدا وخاصة عجلة البسة ههههههه .
وفقك الله وتقبل خالص تحياتي وتقديري .

 

 

الحلقة الثالثة عشرة

الألقــــــاب

عندنا في الحجاز وخصوصا مكه في أسماء يعطوها كنيه أو لقب المثال وهذي بعضها :
عمر : أبو سراج حسن : أبو على
حسين : أبو هلال يوسف : أبو يعقوب
عبدالله : عبادي أو ابو عابد عبدالرحمن : الوجيه
عبد الرحيم : أبو رحمه فيصل : أبو عبدالله
عبد العزيز : عزيز أو ابوسعود فاطمة : فتو
مريم : منّة إبراهيم : أبو خليل
محمد : حماده احمــــد : حمتـــو
حمـــزة : ابوعـــــرب عبدالكريم : ابو كـــــرم
عثمان : ابوعفان جميل : ابو زامل
مصطفى : ابو دلش سليمان : ابوداؤد

كمان الحجازيين فيهم أخلاق و احترام مافي بعدها لما يطلب منك سكينه ايش يقول ؟* * يقولك الله يخليك أديني سكينة في قلب العدو * *
لما يقلك كنت بأكل * * يقلك كنت ب أتعشى مثلاً فضلة خيرك * *
كلمات و تراجمها
بيت الما .....: وهو ما يعرف حاليا (بدورة المياه) وقد سماه الجيل الصاعد المكاوي الآن (الطهارة) وقد ورد انه تم التسمية هذه على أساس انه مكان كبير في البيت يوجد فيه الماء فسمي بـ بيت الما.
القرندي: بفتح القاف والراء وتسكين النون وكسر الدال وهذا نوع من أنواع مداعبة الأب المكاوي لابنه فعندما يناديه ويتأخر 3 ثواني يقله (بسرعة عساك القرندي) ويفسر أن القرندي نوع من أنواع الجن وببساطه يدعي الأب على ابنه بالقرندي
الفقده .....:مفعول من فعل يفقد، وهذا نوع آخر من أنواع المداعبة وهي الخاصة بالأم المكاويه. حيث تداعب أولادها بـ (تعال الله يفقدك)
توتوا......: وهو نوع من أنواع المعادن المكتشفة في الاوديه المكاويه. ويستخدمونها المكاوية في تصنيع نوعين من الأشياء اللي تنحط فيها مويه للشرب وهو ما يسمى بالكاسه)
المغراف ....: المغراف:هو نوع من أنواع الكاسات التوتوا ، في حين انه تمت إضافة معلومة من بعض السابقين انه في مرة من المرات قامت أم تداعب ولدها الصغير (الشقي) اللي يلعب يالمغراف وقالتله الله يفقدك بس وبعدين قلت خلاص يامغراف خده وفي لمح البصر اختفى الولد ، وذلك لأن المغراف هو اسم من أسماء الجن وكان بالصدفة مغراف موجود في هذا الوقت وقام بالواجب
على طبطابي ....: يعني على مزاجي :
مِرَسْتَكَه ......: يعني متأنتكه يعني مرة شياكة .. ومرتبّة
وايـــــق ....: يعني طالع .... يعني مثلاً تقول .. : ( ياواد وايق زي الناس
لا أهبدك باتقل شي قدامي .. ......: ارميك او أضربك باثقل مايجي في يدي .
تـــــزل ....... : يعني تمر
مرحبمبك ... : يعني مرحبا بك .. بس باختصار شوية
باطِرمَـــة ... : يعني جلسة ... كنب حاجة زي كده ...
كَرَاوِيتَه : .....: دكة خشب يحطوا عليها الباطرمة ...
مَدَارِيْه ......: مراجيح ...
اندر ندرت عينك من حُقّها ... : يعني خرجت عينك من محلها ....
شَلْمَه ...: يعني فجعه .. يعني مثلاً تقول ( اشبك ياواد مشلوم كده عالاكل ؟؟ قيّسْتَك : ... يعني حسّبتك .... توقعتك .... هقيتك يعني مثلاً .. ( قيستك ياواد حتزل على عمتك فتّو ) ... وه ياستيته ..
بُخْنُق ........ : اللي يتلبس في الرأس ويكون مخيّط على قده ....
مِدَهْمَلْ : ....: يعني مبهدل .... يعني مثلاً ( اشبك ياواد مدهمل كده .. لاتكون كنت بتلعب في المداريه ) ؟؟
زنبيل .....: ماتوضع به الأشياء التي يتم شرائها من السوق ويكون عادة مصنوع من سعف النخل أو الجلد الصناعي
زلطة ......: سَلطة بعد التعديل ... |
يدعك ......: يعني يفرك ... يعني مثلا .. ( ايش بتسوي يابت ... بادعك الأسورة .. روحي يابت عساكي بداعوك يدعك مصارين شيطانك غسلي الصحون بدل مانتي قاعدتلي كده لاشغله ولا مشغله ....
مجغجغ ......: مليان مويه
مـركن ........: مايوضع عليه الشراب والدوارق الخاصة بالشرب .
شربة .........: اناء من الفخار يوضع به الماء لتبريده من اجل الشرب ( ثلاجة زمان )
النقل ..........: المكسرات والتي كانت تتكون من الحمص والفستق والقعقع والفصفص والخرنوب ، وسمي التاجر المعروف الآن بالنقلي نسبة اليها حيث كان له محل في المدعى يبيع فيه النقل ، وكان يكثر تناولها في الحج ويهديها الحجاج عند العودة من الحج الى ديارهم.
المنقل ........: مايوضع به الفحم للشوي .
الشربوش ...: مايوضع على الفحم ليساعد على اشعالها عندما يهب عليها الهواء .
الهندول .....: سرير الطفل الرضيع
نصبة الشاي ..: ادوات الشاي
المنسج ........: مايوضع فيه القماش الذي يتم عمل السراويل المنسوجة ( المشتغلة ) .

ونختم بابيات شاعر الحارة التالية :ــــ

اهـــــــل اول

أهل أول.. أهل أول..

يافل ياكادي ياكمل ..

ياأهل الأدب والزوق وعشت وبقيت ومجمل..
ياأهل الطيبة والرقة..
والهرجة المتبتبة الدقة..
ورب البيت وحشتوني من التاجر إلى السقا..
وحشني حتى فرقنا ..
بهنداسته وبكشة قماش..
وعم شاكر في دكانه بالفوطة وقميصه الشاش..
وحشتني حلاوة اللدو..
والبركة إللي في يده..
وحشتني الكحلة في عيونه ..
وحوا .. والصبي عبده..
وحشني كل مافيكم..
ياناس حتى أساميكم
ياليت ترجعلنا الأيام وأسلم على أياديكم...
وأشم ريحة الرضا فيها..
وأشياء ماأقدر أسميها..
حاجة كدة ترد الروح .. صعب أوصف معانيها..
أهل أول !
ليسا المستكة في توبي..
تفحفح ريحته تهلي..
وفي السيارة في كم قرش..تشخلل صوتها يسلي..
وبنت أصباعها مدبق بتلحس في قدر ططلي ..
وشيبة فارش المصنف في وسط الليل بيصلي..
وحجة في الزقاق بتقول .. لاتشيلوا قمامة..
واللي يصلح الدافور عمال ينظف المامها
وباسم الطرف في الدهليز ..وكم ليانة ومنجد..
وواحد شحط جاله النوم على دكتنا متمدد..
وهاذا الأخ قال معزوم ومسوي فيها متحشد..
....

أهل أول .. !

تعالوا شفوا اليوم..

كيف صار حالنا في حال..
لا عاد نعرف الموجب ولامعنى كلام رجال..
حتى العمة سبناها لراعي السوبيا والفوال..

 

 

ابوياسر لله يعطيك العافية لقيت لك طريق عليه لكن انا كتبت هذه الحلقات حتى الحلقة 15 في شهر شوال وخزنتها وكل فترة اخذ منها حلقة واعرضها بالساحات ولذلك فلا تقعد تنخش ، على كل حال غيرتها بقصيدة جديدة ، على كل حال شكرا على تنبيهي للتكرار .