قصائد الشاعره عيده العروي الجهني (وحيدة السعودية)

.

*****

( واقلبي .. )

واقلبـي اللّـي غـاديٍ لـه تخافـيـق = وأخـاف مـن بيـن العلايـق يـفـرّا
أروح ما ادري وين ..؟ من زايد الضّيق = احتـرت مالـي بالـوطـا مستـقـرّا
وتفتّحـت بيـبـان قـلـبٍ مغالـيـق = قلـبٍ علـى كتمـان سـرّه مـضـرّا
وين الصديق اللّـي يصـون المواثيـق = ماحولـي إلاّ مــن نـوالـي بـشـرّا
أمشي وأنا من سكـرة الفكـر مافيـق = ولوني وطيت الجمر ما أونسـت حـرّا
وقـتٍ تــولاّ غيـرنـا بالتوافـيـق = واغـدى علينـا عقـب حلـواه مـرّا
وإليـا رفينـا ثوبنـا فـيـه تفتـيـق = وإليـا جبرنـا كسـرنـا زاد كـسـرا
كـلٍ رمـانـا بالسّـهـوم المطالـيـق = وكـلٍ تمنّـى يـوم جيـنـاه عِــذرا

*****

 

 

.

*****

إلى أحب إنسانه في الوجود ( نوره )

عيني اللّي سِعدها من شوف ( نوره ) = علّ ماتبكي على ( نـوره ) عيونـي
كان جَتْ يمّي فانا صِـرت مسـروره = وكـان عنّـي روّحـت لا واغبونـي
رحـم أبوهـا يومنـا كنّـا بـزوره = ماتزعّلنـي ولـو هــم زعّلـونـي
خيّتي وقـت الشّدايـد لـي صبـوره = يوم بعض النّـاس بالشّـده مهونـي
خيّتي وإن صارت الحـال إمعسـوره = وقّفت يمّـي ومـن حولـي ودونـي
وكان زانـت لـي مـن الأيّـام دوره = جـتْ تبشّرنـي بتوديـع الحزونـي
علّنـي فـدوه لهـا مانـي نكـوره = مثلما صانـت تـرى حِنّـا نصونـي
حقّها بالقلـب مـن دافـي شعـوره = وحقّهـا بالطّيـب نافـي مانخونـي
عيني اللّي سِعْدها من شوف ( نوره ) = علّ ماتبكي على ( نـوره ) عيونـي

*****

 

 

.

*****

( فارس الأحلام )

ألا ياطول ما ارجي ويش بارجي = جهلت وماحصل لي عِرف حالي
إذا ضاع الحلا مع زود غنجـي = وفتّـاك النّواظـر والـدّلالـي
على من لاعرف بالسّوق حرجي = ولا قدّر لنـا نـوف الخصالـي
أبي لي فارس ٍ رجواه سرجـي = وسيفٍ يـودع العـدوان تالـي
وبيتٍ نايف فـي راس برجـي = يلوّح بالكـرم شـرق وشمالـي
أدوّر مـن عنـاي بكـل فجّـي = عن إنسان ٍ تصوّر في خيالـي
تعبت وفكري السّـارح يسجّـي = وعيني دمعهـا بالكـود سالـي
ولا لي حيلـة ٍ ويـن المهجّـي = وخلفي هـمّ وأحزانـي قبالـي
ضياع ٍ فكرتي والتّيـه نهجـي = وعمري صار مرهون ارتحالـي
ومثلي بالعـرب ماظـن ينجـي = تدوسه بالدّهـر سـود اللّيالـي

*****

 

 

.

*****

( غنّيت يالورقا )

غنّيت يالورقا وجتنـي هواجيـس = وقامت بجوفي من عنا الحال تجتال
وهاجن بقلبي مثـل دقّ النّواقيـس = وجاهن جواب العين بالدّمع سيّـال
يالوِرق كم لي غارسٍ لي غواريس = بارضٍ ربيع وتستوي فيه الأعمال
وكم ليلـةٍ حوّفتهـا بالحواريـس = من خوف ياطاها من النّاس جهّـال
ويوم استوى زين الثّمر كالمقابيس = وإلاّ كما برقٍ على الشّـرق همّـال
جاها هبوب وصوّب العود تيبيـس = وأضحت كما حيدٍ عليه الدّهر حـال
ياالوِرق عشّك ماغزته القرانيـس = ولا صوّبت قلبك من الحُبْ الأنبـال
يالوِرق دوني مقفـلات التّرابيـس = وأنتي على الأغصان في فيّ وظلال
لا واهنيّك فـي بـراد النّسانيـس = مادون نسناس الهوا سِجن وحبـال
حرام نوحك فوق غصنٍ بك يميس = مافوق ميس العصن مايشقي الحال
ليتي مكانـك ماحدتنـي محابيـس = والله لأغنّي وأرفع الصّوت بالعـال
يا الوِرق شوقي شوفة البلّ والعِيس = وأنا مع البِدوان في حـلّ وِرْحـال
يازين شبّـة نارهـم بالمداميـس = بالخصْ لى سوّوا من الكيف فنجال
وإليا لفوا ضيفانهـم بالمجاليـس = شافوا معازيبٍ لهم يطـرب البـال
يا الوِرق حالوا دون خلّي حواسيس = لأهل الهوى من بدّة النّاس عـذّال
حطّوا لنا بالدّرب هوش ومتاريـس = ليما حَدَوْا محبوب عيني على الجال
لا واعذابِكْ يالعيـون النّواعيـس = من دون خِلّك حالت بحور وجبـال
من غير خِلّي له شريت الملابيـس = وِلْمَنْ جديلٍ فـوق الأمتـان نثّـال
عسـاه يفدونـه كبـار الدّنافيـس = اللّي كما الحرمه على شكل رجّـال
اللّي تصوّر بالحكي صورة إبليـس = وإليا مشى من زايد الكِبـر يختـال
إتهون نفسه دون فِلْسٍ من الكيس = ودايم على عيلات الأجـواد نقّـال

*****

 

 

.

*****

( عوّدت عيني )

عـوّدت عينـي بعـاداتٍ لهـا زينـه = ماتبكـي لراحـلٍ أو تفـرح بـلافـي
حيث إنْ من هو لفـى لازم ظواعينـه = ترحل .. ومن هو رحل عنه ألف خلاّفي
وقـتٍ تعلمـت زيفـه فـي قوانينـه = ظالم لباسه بعينـي لبـس الإنصافـي
كنـت آتخيّـل ربيعـي فـي تلاوينـه = حلمٍ صغيـر برعشـة خافقـي طافـي
وأضحك ودمّي كتـب حرفـه بسكينـه = وأبكـي توجّـد لشـيٍ غايـب خافـي
شيٍ تعلّـم لسانـي النّطق..لـه وينـه = دونه من الغيب ستـرٍ داجـيٍ ضافـي
وعمري على ويش بأنطر تالي سنينـه = عذابي اللّي مضى عـن مقبلـه كافـي
والشّعـر خلّيـت دمّـي فـي ميادينـه = وباعتى بحوره صلبت بفكرتـي قافـي
وحاربت في ليلـه الخايـف شياطينـه = وعوّدت من رحلة الرّمضا وأنا حافـي
عوّدت قلبـي جريـح وبينـي وبينـه = وعْدٍ يجـدّد بقلبـي جـرح الأسلافـي
أنـا رهينـة ضياعـه فـي موازينـه = يومٍ تجرّعـت بيـدي سمّـه الصافـي
وأنـا تعذبـت أدوّر عـن عناويـنـه = حتّى لقيتـه بجوفـي حلـم وأطيافـي

*****

 

 

.

*****

( عوّدت عيني )

عذبتني ياشوق من يبـدع لحـون = وأودعت قلبي من تشكّيك منصـاب
إن كنت مفتونٍ فأنا فيـك مفتـون = وفي حب قلبي لك يحيرنّ الألبـاب
وبجاه ربٍ كـوّن الكـاف والنّـون = اللّي جمعنـا دون ميعـاد وأسبـاب
لأرجيك رجوى حايل البدو لمـزون = لو إن دون وصالكم قطع الأرقـاب
ياكثر نـاسٍ قبـل حبّـي يحبـون = وياقل وافين العهد بيـن الأحبـاب
والله لـو كـل المحبّيـن يجـزون = عن حبّهم قلبي عن الحـبْ ماتـاب
لاتحسب إن الحبْ بالقرب مرهـون = لو غاب شخصك صادق الودّ ماغاب
ويّاك لو تبعد ترى القلب مشطـون = لأجلك تحمّل بالهوى هَمْ وانصـاب

*****

 

 

.

*****

( على زمانٍ فات )

هذه القصيدة شاركت بها وحيدة السعودية رداً على قصيدة اللغز الثالث الذي جعله الشيخ محمد بن راشد آل مكتوم قصيدة سنوية لتحريك الساحة الشعرية كل عام ورصد لمن يقوم بحل اللغز جائزة سخية ولم يحالفها الحظ في التّوصل لحل اللغز ولكن حصلت على تكريم الشيخ محمد بن راشد آل مكتوم وكان التكريم لجودة القصيدة أروع تكريم وأروع هديه تلقتها شاعرة نبطية

أنــا بلـيـت بعـلّـةٍ ماتطـيـبـي = وأزريت أدوّر طِـبْ ينفـع لمـا بـي
الصّاحـب اللّـي بالخلايـق حبيـبـي = سيفه قبل عدوان عينـي سطـى بـي
وأنا عليـه إجعـود راسـي سريبـي = وفي مبسمي له نـادي الهـرج ذابـي
عليـه دمعـي كـلْ ليلـه صبيـبـي = والصبـح مـن دمعـي تَعَـوّم ثيابـي
ياليـت قلبـه مثـل قلبـي صويبـي = مير البلا إنّـه سالـمٍ مـن صوابـي
أقفيت عنـه وجـرح قلبـي عطيبـي = جـرحٍ بقلبـي باقـيٍ مابقـى بــي
يالقاف أنـا لـولاك محـدٍ دري بـي = عليـك أشـدّ بكـل ليـلـه ركـابـي
مـع كـل فـجٍ نوقهـا تنتحـي بـي = وإن ضاقوا الرّكبان قافـي حـدا بـي
يا الآدمي وش لـك تشـوم الرّقيبـي = وأنتـه تـراب ومرجعـك للتّـرابـي
لـو كنـت بالضّلعـان وألاّ الشّعيبـي = لابـد يجـري مـاحـواه الكتـابـي
جرّبـت بالدّنيـا وعقـلـي لبيـبـي = ليمـا تمـلاّ مـن زمانـي جـرابـي
نـوبٍ قـراح المـا بوسـط القليبـي = ونوبٍ عطـاش ومقتفيـن السّرابـي
والله علـى كـلْ الخلايـق حسيبـي = ولابـدّ مـن يـومٍ يحيـن الحسابـي
ومافيـه حــقٍ للنّهـايـه سليـبـي = ومافيـه حـقٍ مايجـيـه استـلابـي
وإن كان ماسيف البنَـى آدم صليبـي = يـب يشبعنّـه بالـطّـراد الحـرابـي
دنيا كما مـوج البحـر تلتـوي بـي = وإن ماسبحت اليوم موجه غـدا بـي
قمـت أتفكّـر بالـزّمـان العجيـبـي = ويـن السّعـاده والحلـوم العـذابـي
إعصير والنّسنـاس لـي مستطيبـي = دولاب فكري دار بي وإستـوى بـي
علـى زمـانٍ فـات شقّيـت جيبـي = وعضّيـت زاهيـة الشّفايـا بنـابـي
ليـت الأمـانـي للمعـنّـى تثيـبـي = ليـت اللّيالـي يرجعـن للـورا بـي
حتّى اتزهّـب قبـل وقـت الحريبـي = وأصـكّ مـن دون الغرابيـل بـابـي
من قبل داجي اللّيـل راسـي يشيبـي = وأنـا بعـد ماجـزت زهـر الشّبابـي
أثر القصيـده مـن حياتـي نصيبـي = والباقـي أشبـاحٍ طواهـا الغيـابـي
ومادام لـي فـوق الوسيعـه دبيبـي = أعيـش قيفـان المشاعـر زهـابـي
ياشيـخ لاهـاض الخيـال النّجيـبـي = كنّـه علـى بعـد المسافـه درا بـي
لاقلـت قـولٍ مـن فـوادي قريبـي = وأنته بعيـد وفـوق متـن السحابـي
وشلـون يـاراع الزّمـان الرّطيبـي = تحيا الرّفـاه وتكتـوي مـن عذابـي
ياشيخ وأنـت الذّيـب وابـوك ذيبـي = وإليـا عـوى ذيبـان ردّ الذّيـابـي
إقنِـبْ علـى راس الطّويلـه قنيبـي = لابـد تلـقـى صـيـدةٍ بالـرّوابـي
ياشيخ قافـك واشهـد إنّـه صعيبـي = تقطـع سهلهـا للوعـر والصّعابـي
مـادام بالعربـان شخـصٍ عريـبـي = أبـوه شيـخ ولـه خـوالٍ عـرابـي
جـاك الجـواب وكلّنـا نستجيـبـي = مثـل البـروق إن سيّلـنّ الشّعابـي
إن صبت صبت وكان حلمـي يخيبـي = عنـدي عـزا ماكـلّ رمّـاي صابـي
ولا كـل قصّـادٍ بـحـوره غبيـبـي = ولا كـل زرّاع يـحـوش الثّـوابـي
الشّعـره الـلّـي دايــم ماتشيـبـي = سوادهـا يشبـه جـنـاح الغـرابـي
معاويـه لـه شعـرةٍ يـا الأريـبـي = بينه وبيـن النّـاس فيهـا إنجذابـي
وإن كـان شدّوهـا رخاهـا بطيبـي = وإليـا رخوهـا شـدّهـا مايهـابـي
راحت مثـل للنّـاس شـبٍّ وشيبـي = يحكـم بـه الحاكـم عتـاة الرّقابـي
والرّامـي اللّـي لارمـى مايخيـبـي = وإن صاب سهمه من عظيم المصابـي
المـوت سهمـه بالمنايـا رهيـبـي = وياعلّنـا عنـد الـولـي نستجـابـي
ياعـلّ مثـوانـا بــدارٍ رحيـبـي = فـردوس ربّـي والجنـان الرّطابـي
والسّبعـه الصّبيـان أمـن وحريبـي = أسبـوع وأيّامـه بِهِـنّ إنشعـابـي
اللّيـل فيـهـن راحــةٍ للتّعيـبـي = والـرّزق يجلـب بالنّهـار إجتلابـي
والجاريـات اللّـي كخيـل العريـبـي = الرّيـح تجـري حولنـا بانسيـابـي
ريح الصّبا من ( نجد ) هبّـي هبيبـي = عرار ( نجد ) اللّـي يقولـون طابـي
وأيضـا البحـور الزّاخـره بالغبيبـي = وما للسّفن فـي عبّهـا مـن ذهابـي
هذي بحور الشّعـر تطـرب طريبـي = منها ( الهلالي ) و( الهجيني ) لعى بي
وإن كـان نيـران المـودّه شبيـبـي = هيجنت أنا مع حِـسّ عـود الرّبابـي
وأيضـا العلـوم الكاذبـه ماتعيـبـي = لـو كـان نرويهـا بغيـر احتسابـي
الشّعـر كلّـه مـن خيـال الأديـبـي = أبيـات تِبْنَـى دون عمـد وطنـابـي
ياما على كـفّ التّخيـل سـرى بـي = هوجاس شعري يـمّ حلـو الرّضابـي
قلت إن شوفـه قـد حصـل يانديبـي = وأنا بعيـد وشيـن حظّـي هَفَـا بـي
القاضي اللّـي كـلّ حكمـه صويبـي = يحكـم وحكمـه دايـمٍ فـي صوابـي
هـذا هـو الميـزان مالـه صحيبـي = ماقـال هـذا واحـدٍ مـن صحـابـي
وياويل مـن هـو بالمـوازن لعيبـي = يبشـر بـنـارٍ حـرّهـا بالتهـابـي
والرّجـل ذاك اللّـي بشانـه مريبـي = ولاهـو بشيـخ ولا عزيـز الجنابـي
هـذا هـو الحـلاّق موسـه ذريبـي = وإن قال لـك ياشيـخ ماقلـت مابـي
وأيضا الصّبـيّ اللّـي أبـد مايشيبـي = ليمـا يجيـه المـوت ماقيـل شابـي
ذاك الغـراب اللّـي سـواده غريبـي = ذاك الغـراب اللّـي سكـن بالخرابـي
عقبه زكاة النّفـس عـن كـل ريبـي = عند الشّهـاده مالهـا مـن نصابـي
والدّمع يجـري دون عيـنٍ سكيبـي = وكـم بسببـه مـن فتنـةٍ واحترابـي
هـذا المطـر والبـدو يمّـه عزيبـي = وإن شحّ تِنْهَـبْ كـل ناقـه نهابـي
له شمّلـوا مـع فطّـرٍ قيـل شيبـي = وله جنّبوا عقـب الشّمـال اجتنابـي
والسّايـل اللّـي يجتمـد باللّهيـبـي = هـذاك صنـع منقّشـات الخضـابـي
عقب إحلبنّه وإن غـدا لـه شخيبـي = ثـم إمخضنّـه ليـن بـان اللّبـابـي
وأصبح لبن من عقب ماهـو حليبـي = يوضـع بنـارٍ ضـوّهـا باشتبـابـي
وياما حـلا وإن كـان جانـي طليبـي = سوق الجميده قبـل سـوق العتابـي
ودارٍ ذكـرتـه ذكـرهـا مايغيـبـي = النّيـل فيـهـا سـايـغٍ للشّـرابـي
( مصر ) وبها لأفضل بنـيّ النّسيبـي = أرض الكنانـه يمّهـا القلـب صابـي
ويامصر حسنك ماجلـب لـك جليبـي = حسـنٍ أصيـل طـيّـب الإنتسـابـي
شعبـك لطيـف ومعشـره مايعيبـي = من عـاش بـك مايشكـي الإكتئابـي
وياشيخ لـو حالـي ذهبتـه ذهيبـي = من غربـة القيفـان حـان الإيابـي
عـوّدت قلبـي باللّـقـا مستهيـبـي = وحـقٍ لمـن مثلـي إذا قيـل هابـي
أخـاف عقـب إنّـي كتبـت الكتيبـي = يكـون بالخـذلان عنـك انقـلابـي
ولولا الأمل ياشيخ وش ينبغـي بـي = إتضيـق روحـي بالفجـاج الرّحابـي

*****