طاح العتب

من بريدي .. أتمنى أن تروْق لكم

قصيدة للشاعر: عبدالله بن ذويبان المطيري

بعنوان:
طاح العتب

[type=306347]

طاح العتب .. ما هيب لحية مشاريه
خل الكلام .. و حبل الأعذار طوّه

ما راح أقول إشلون .. أو كيف .. أو ليه ؟
ترى السؤال بدون أجابه مشوّه

العذر مااات .. و مات همه و رااعيه
و الجرح جف .. و جف غيمه و نوّه

صاحبك ضاع الهرج من بين أشافيه
ما كنّه اللي كان قبلك .. مفوّه

يجمع لك مِن الشعر فاخر معانيه
و يموت عندك قبل فيه ايتفوّه

ليه أنصدم ؟! و تخون قلبي هقاويه
و يطيح نجمي .. و أنخذل في علوّه

أصدق مع الواحد و احبه .. و اثاريه
طوول الليالي معتبرني عدوّه

لا يا بعدهم .. و أول الغيث تاليه
و أنت اتعرف قلبي .. و خيره و سوّه

يمكن لو انك قلت غلطان .. قلت إيه
مير البلا انك قلت .. ناقص مرّوه

قل لي متى شحيت في شي ٍ أعطيه
و قل لي متى صارت محبتك .. خوّه

يصعب على الرجال يثبت مباديه
وِ ان كانه اثبت .. كيف يثبت سموّه

الله يبيحك عن خطاك و تماديه
و يبيح قلبك عن خطاه و غلوّه

ما دام حبك خالطه شك .. ما ابيه
حب العتب و الشك .. ما اعيش جوّه

ما كنّي اللي كل ما تلمس ايديه
يغمرك باحساس و حنان الأبوّه

و ما كني اللي كل ما مر طاريه
ضج الفضا باسمه .. و عكر هدوّه

يا مرحبا بالجرح .. و الله يحييه
لا صار من يمناك و الجرح توّه

بعض الجروح اِن صابت القلب تنهيه
و بعض الجروح .. تزوّد القلب قوّه

الله كتب .. و القوس في كف باريه
و اللي تشوفه يا ابيض الوجه .. سوّه

[/type]

 

 

وإن من الشعر لحكمة

راقنا ماراق لك

محبك

 

 

المشاركة الأصلية كتبت بواسطة tarafen

وإن من الشعر لحكمة

راقنا ماراق لك

محبك

أخي العزيز: tarafen

ازدانت القصيدة بحضورك .. أدام الله عليك سرورك.

لك التحية والسلام، والتقدير والاحترام.

 

 

بعض الجروح ان صابت القلب تنهيه
وبعض الجروح تزود القلب قوه
....
اخي الكريم سعيد راشد
صح لسانكـ وعلا شانكـ
يعطيك العافيه القصيده اكثر من رائعه
تقبل مروري