يوميات البريهه

يوميات البريهة ( 14)
عقلزه محبوسه في الشرطه ( 4 )

اليوم اتصلن وحدة قريبتنا
من مكة وسلتها عن موضوع عقلزة
وقالن لي عقلزة راحن مع أهلها مكة
عشان يحاضون فرشة
ممدوح بن حنش بن قحيقح
وحنش ذيه في مكة من يوم
هوه صغير وتزوج مكاويه ولاقيد
خرج الديرة من ذاك النهار
وجهلته وبناته ما يتهرجون
إلا هروج أهل البلد على قولهم
المهم بنات حنش راحوا بعقلزة
لاسواق العزيزية عشان ياخذون
لها ملابس جديدة تحاضي بها
واختاروا لها على زوقهم
كرت وبنطلونات جنز
وهيلاهبه وغيرها
وبغاهم البايع يدخلون محل
تجريب الملابس وابن عقلزة
وقالن والله لو كان تتنكسون
ما اعدي ..آنا قيد سمعت
انهم ياهبون كمرات تصوير
مدسوسة ويتشبحون للبنات
فاتفقوا مع البياع على دفع
الثمن وأخذ الثياب على
أن يرجعونها في نفس اليوم
لا ما ناسبها القياس
بس هذا اللي تعرفه قريبتنا
وآنا أدري ما بيعلمني بالصداق إلا آبي لا تاع .

منقول....
يتبع ......

 

 

ذكرتنا بالبريهه وقصصها
انت رائع يا سعيد الفقعسي
نتابع جديدك بكل شوق

 

 

المشاركة الأصلية كتبت بواسطة الوهج

ذكرتنا بالبريهه وقصصها
انت رائع يا سعيد الفقعسي
نتابع جديدك بكل شوق

مرورك الأروع حفظك الله ورعاك
ولا هنت

 

 

يوميات البريهة ( 15)
عقلزه محبوسه في الشرطه ( 5 )

آبي وامي تاعوا من مكة وعلموني بنهاية قصة عقلزة وسبب سجنها وقال لي ابي:
بعد ماوافق راعي الدكان أن تاخذ عقلزة الثياب وتتقايسها وتردها إن كان ماجن عليها
راحن عقلزة البيت وبدأن في اللبس وابن تسمح لحد يعدي معاها
وخرجن عقلزة لبنات آخوها وهي لابسه الملابس الجديدة لكن مبعجة من مكان ومشقوقة من مكان
وهي تصيح من شد الملابس على جسمها ولا اخرجوها من الملابس
إلا بعد التعب شد من مكان وسحب من الثاني وأخيرااستخدموا المقص ..
بس رجعوا لمحل الملابس وقالوا انها ضيقة ولا تصلح
فتشها البائع وضاق وصيح في وجوههم قالن له عقلزة انحن ما شقيناها ثيابك همدة وخيابه ..
ومع هذا الكلام أطلقن صوتها العالي المزعج الذي لفت أنظار زبونات المحل ..
فغضب الفلبيني وقال لها شرررررررررررررب ..
والله يخلف عليه انحن جرب والله ما جرب الا انتن ياجربانين ياخربانين
ورثمنه على لحيه فانكسر لحية وسقطن منه سنتين
وجاء الثاني يفزع ورفسها برجله في بطنها ( تيك وندو) على قولهم
وإذا به يبنط في كرشتها ويرتد على الجدار
ووقع على قلة راسه وذيه هو اللي في العناية
والثالث جاله ما تيسر ..وجو الشرطه ولا حد قدر يلزم عقلزة
وفكر واحد من العسكر واستحب بخاخ الحريق وبخها به وان الله يقدرهم عليها..
و سحبوهاعلى السجن ولا بيخرجونها منه لين يفيق اللي فالعناية.

منقول....
يتبع.......

 

 

يوميات البريهة ( 16)
عقلزه عسكرن

أتصل قحيقح بآبي وقال لازم تجي مكة ياحسكل آنا ما استغني عنك وافلح وقعد ثلاثة أيام وتاع ولا خلنه الكهلة ينتسم وقالن تعال ياحسكل بشرني عن الضعيفة عقلزة.. قال أبشرك بخير وعسكرن قالن له الكهلة ايش يافيت قال أزمي ياكهلة،قلت وآنا قال حتى انتي يالبريهه أزمي:
كانن عقلزة راقده في الحبس ولا تدري عن الضولة اللي فالحبس واثر ان مجموعة من التكرونيات تهاوشنه بينهنه بين ويوم دخلنه السجانات توحدنه التكرونيات وضربوهنه ...
وكل الضولة تيه وعقلزة راقدة نومها ثقيل ولا تقوم من المدافع..
المهم واحدة من التكرونيات تخطلمن في كرشة عقلزة وانها تنتفر ولاهلا تزم الواحدة وتطخبها لاونها ما تتحرك من مكانها تقلون جعل وشوية لا ون التكرونيات كلهنه غايبات عن الوعي
ودخلنه السجانات وكتفوهنه ..
ودري مدير الحبس ببطولات عقلزة وقال والله ما شي كماها وناخذها بدل ذلا الجفف اللي لاينطحنه ولا يقلنه انبع...
وزهم عقلزة وقلها انحن بنخرجك من مشكلتك كما يوم نخرج الشعرة من العجينة ..ونبغيك تشتغلين معانا عسكرية ...قالن آنا مقدر أقلك شي سالوا آبي ولا قال تم آنا كماه.
زهم ريس السجن قحيقح وقله لا ون قحيقح يتصرفد وعصب وضاق وقعد ينبط وكان آبي معاه
قال وين أودي وجهي من جماعتي وشاقلهم آقل بنتي تشتغل عسكرية وفالحبس ..قال آبي للريس كم بتاهبلها قال ما يقل راتبها عن 4000 ريال مابين راتب وبدالات ومعيشة..
لا ون قحيقح يفغر ويبصم ووده يوافق ويبغي له عذر..قال آبي وافق ياقحيقح قال وين أودي وجهي من جماعتي ..قله آبي وين تودي وجهك لو ما اشتغلن ...بنتك ما حد بياخذها وبتقعد في حلقك مبغبغة وخلقه يالله لك الحمد وكعشتها كما الجرمة وخرشة وتاكل ما تشبع ..ولا عاد معاها معاش وتاكل في الحبس بعد تشوف الجماعة والله ليضلون يتناقزون لها من سيالة لين الأحسبة..
والله ما كود بذيه الكلام قال موافق..
بس واشتغلن عقلزة عسكرية وعود قحيقح بينقل باهله كلهم مكة ...
يقل آبي ليتك تشوفين عقلزة يابريهه ترص أهلها كلهم صف واحد أبوها فالأول وامها وراها وجهلة أخوها وراهم ...واهي استعد استريح...
هني عقلزة وظيفة حالية ومعاش كبير ...والخطابة بيضلون كما الرز.

منقول....
يتبع......

 

 

يوميات البريهة ( 17 )
شقحه مغتاضه

البارح ياحباني يمكن نص من الليل لا ون الباب يدق ...وأول من استقعد جدتي متعبه وقالن يالله ليل خير ..فك آبي الباب لا ونها شقحة بنت قحيقح وعدن وانحن نقل يالله اجعله خير واشجاب شقحة في ذالليل ...
شقحة تيه نكحن واحد صروي ومعها منه خمسة جهلة ...ويوم جن لا ونها وحدها مامعها ولا برتوع ...
بعدين جدتي متعبه قعدن معها ونشدنها قالن آنا تعت عندكم عشان أهلي بعد ما تاعوا من مكة قالن الله يحييك ياشقحة ما بياجينا خير منك..
المهم المخلوقة تاعن مغتاضة والسبب كله من عمتها أم بعلها وهيه من الكهيل اللي الواحد يتمنى ان الله ياخذ وداعته ..من يوم نكحن شقحة وهيه تشتكي منها تاهب الميرة كلها في عينتها ..وكل يوم تخرج لشقحة حق صاصه وصفح رز ونقس بصل وفنجان زيت وشوية ملح
وتقلها اطبخي الغدا ياشقحة ...وصبرن الضعيفة عشان بعلها طيب ولا قيد أخطى عليها وقالن باصبر عشان جهلتي وقعدن السنين تيه كلها وقالن عسى الله يفرجها والكهلة تخرج عليها في كل شي ...والولد مقوده مع أمه ..
والغدا كل يوم شكل: يوم رز ونتفتين لحم ويوم رز ونص ديكة ويوم رز وتونه ويوم رز وصاصه
ويوم معدوس ، والفال والعشا ماشي الا قرصان ومعرق واوقات حقينة والضعيفة تملخن جنوبها من المطحنة.
ولكن من اسبوع تغيرن الكهلة وزودنها تقوم من الفجر وتصك الكنديشن على شقحة وجهاليها
ولا تخليها تغسل في الغسالة وتقل ليش يمه في ايديك حنا ولا تخليها تحوق بالمحوقة الكهرباوية
ولا تخليها تتفرج فالتلفزون ..وتقل الفاتورة حقة الكهرب سون مصروف جديد ..وآنا ولدي ضعيف وآخر شي خذن جوالها وسحبن التلفون عنها وانتقلن التلفزون وهبنه في عينتها ...
وحلفن شقحة ما عد تقعد ...قالن الكهلة في ثمها وخذي جهلتك معك قالن والله ماخذهم ماخليهم الا يرحون فوق قلبك ...وعود الضعيف ندرها ويوم مالقين أهلها تاعن عندنا وانحن في حرى
ان اهل المخلوق ياجون يشفعون وقال آبي ان كان جا مالك الاآخذلك الحق من ظهره طابق مطبوق واشترط لك رضوة ماقيد ضلن ...ولكن أول باستشير آبوك ...
عاد انحن في حرى الرجال يجي يشفع واعلمكم

منقول.......
يتبع........

.

 

 

يوميات البريهة ( 18 )
شقحة عودن


آنا قيد علمتكم ان شقحة بنت قحيقح مغتاضة عندنا المهم يوم آبي في مكة مع قحيقح علمه قله ياحسكل شقحة بنتك كما البريهه وان جا الرجال شفع وهبلها رضوة حالية ردها والا جيبها لي في مكة هنية عسى عقلزة تلقالها وظيفة فالحبس معاها ..
المهم الرجال جا لآبي وقله ياعم حسكل والله اني ابغي مرتي لكن الله يهدي الكهلة نغصن علينا حياتنا وآنا ودي أردها لكن الكهلة حلفن اني ما هبلها رضوة وقالن ان كان عودن كذيه والا باعطيك بنت اختي شريفة من يوم مات بعلها وهي ميتم ...قلت لها الله يستر علينا وعليها وآنا ما ابغي الا مرتي..قله آبي روح ويسير خير.
آبي يعرف واحد صروي قحم من عهد حطمة يجي يشترى تبعان من عند آبي ويذبحها في بلجرشي فندر القحم عند آبي يشتري منه ..قله آبي انته ما عاد نكحته يامزهود بعد ما ماتن المرة ..قال لا والله شن بياخذني ..قله آبي آنا معي لك كهلة صروية قال ايدي على ايدك ياحسكل
وتواعد آبي معاه وجابه في بيت رحيم قحيقح وقال الوالد انحن جينا خطابة قال آنا بناتي صغار ولا هم في سن الجواز ...قال انحن خطابة فالكهلة ...وضاق الولد وقعد ينفخ ويتزبط وقال والله ياحسكل لو منتم في بيتي انه ليصل الدم للركب ..فالكهلة سمعن الضولة وصفقن له ورحلها ونشدنه عن الضولة فعلمها ...لا ون الكهلة بتتشادق من الفرحة وقالن ليش ياولدي تنكد عليه وآنا امك ...وانته تبغي يفوتني القطار واعنس واقعد في حلقك وحلق مرتك ...قال يمه عيب تنكحين وشاقل لرفاقتي ...قالن قل امي نكحن.... قال يمه قحم ..قالن وآنا كهلة..قال يمه جزار
قالن صنعة فاليد أمان من الفقر، وبيشبعك من اللحم انته وجهلتك ...
عود عند آبي وان آبي يقله الله يهديك انته ما تبغي مرتك تعود خل الكهلة تفلح وتريحكم من الصرصرة والهوشه .. قال هيا على بركة الله ...
وقام آبي طلع شقحة الحجاز وحنن الكهلة وافلحن معاها السوق واشترن لها كرت وحذيات وودنها عند الكنفيرا ...وجرن ليلة فرح ما قيد جرن في تاك المحلات ...
وانهم يتلون الكهلة في ونيت القحم وقالوا من سد عين أم الدقيق.

منقول................
يتبع .................

 

 

يوميات البريهة ( 19 )
رب ضاره نافعة


قالن لي جدتي متعبه يابريهه الانسان ما يدري فين الخير وفين الشر ويمكن يحب شي ويطلع له شر ويمكن يكره شي ويطلع له خير قلت ايش يافيت ياكهله قالن اسمعي يابريهه قصة معيضة وآبو شوك، قلت هات ياكهلة قالن ازمي:
كان فيه واحد اسمه أبو شوك قصير ومقذنب وضروبه ولو حد شافه ما يستعني به وابو شوك ذيه ما يمشي إلا ومشعابه فايده ...وشغلته بسيطه يتسرق العبيد من الديرة والديار المجاورة ويندر بهم مكة يبتاعهم ...
ويوم من الأيام وفي ليل مظلم شاف أبو شوك قينه تكلا عند البلاد اسمها معيضه ويعرفها وتعرفه وهجم عليها وركها بالمشعاب واغمي عليها ولا فاقن إلا وهيه في مكة وباعها وانتقلن معيضة من ايد لايد الين الله هبها فايدي ناس شيوخ عتقوها وجوزوها وهبولها بيت وصرفوا عليها وعلى جهلتها ...وعلموهم وشغلوهم وعادن راعية مال وعقار هي وجهلتها وطوال هذي المدة وهي تتذكر اختها معيوفه وتتذكر آبو شوك .
ومرن الأيام وخطبن لولدها في الجنوب وراحن تجوزه وهي في طريقها مرن بديارها الأوله وتذكرن اختها وتذكرن آبو شوك وقالن لولدها تيه ديارنا ولازم آمر على خالتك معيوفه آشوف هيه حية والا ميته ومرن على اختها ولقينها كبيرة عجيفه حاسرة من الكبر ومن الفقر وعدم القبال وخذن اختها وقالن لها خلاص يخته والله لتروحين معانا نجد ...وفي الطريق تذكرن آبو شوك ومرن عليه ويوم عدن لا ونه حاسر ولا معه لا ولد ولاتلد ماشي الآ كهلته ...قالن له عرفتاني يابو شوك قالها لا ..
قالن له آنا معيضة قينة اليوسف ...لا ونه يتنافض وخاف منها ...قالن له لا تخاف يابو شوك والله اني ادعي لك من سنين روح يابو شوك الله يسامحك ويغفرلك والله اني سامحتك لو مو الله ثم انت ومشعابك كان آنا ذحين كما اختي معيوفه ....والله انك نفعتاني نفعة مانساها لك ...وهبن له عشرين ألف ريال ....
ولا تحسبون انها نسينه كل سنة ترسل له في رمضان ما تيسر.
والله ياحباني إنا ماندري فين الخير.

منقول............
يتبع............

 

 

يوميات البريهة ( 20 )
يوم في حياة ربة بيت في الماضي:


سلت جدتي متعبه عن عملها في الماضي
وقلت ياجدة مثلي لي يوم من أيامك في الماضي
قالن لي يابريهه أزمي:
أقوم الفجر أصلي ما تيسر
أشب الميفا
أرد البير اجيب قربة ولا قربتين
واصبها في الزيرة وفي المواعين
أندر طاسة الروبة من الشبكة
واحقن الشكوة وامخضها
آقوم اعلف الحلال واسقيه
أعود على مخض الشكوة
أندر قدر العجين من الشبكة
أخبز القرصان في الميفا
اقدر للقهوة فوق الجمر
واهب البن والحوايج
امخض الشكوة
ارفع الزبدة في ميعان
عشان ناهب منها سمن
أندر القرصان واصب الحقينة
واقرب الفال ...
آخذ فال بعلي واوديه له عند البلاد
أغسل المواعين واحوق البيت
وانزي الحواق فوق الدمنة
اقرب طشت الغسيل واغسل الثياب
أقوم اشب للغدى ولا كمل
احول للجهله غداهم
واحول غدا بعلي واوديه عند البلاد
آعود للبيت واتضيع واتفقد الحلال
المغرب يوضوي بعلي ونتعشى ونرقد
وبعض الأيام يختلف الشغل
عشان كل شيء كنا انحن النسوان
نقوم به ...
وبعد أعلمك يابريهه عن كل شي.
قلت الله ياجدة والله انكنه كنتنه تتعبنه
قالن خليها على الله يابريهه
كانن أيام تعب وشقى ..ولكن الله
يسقي تاك الأيام.

 

 

يوميات البريهة ( 21 )
فتًح بعد خمسين سنه

أمس رحت مع اختي الكبيرة سملقة عند بنتها وقلت منها أشوف بنت أختي ومنها أشوف البنت الصغيرة اللي تاعنبها ..ماشالله تبارك الله بنت مزينة ماقد ريت كماها ...
المهم بنت أختي الكبيرة قالن يابريهه اليوم باعلمك بقصة لواحد قريب لجارتي وقصته غريبه
قلت هات يخته قالن أزمي :
قالن زمان يوم الفقر والجوع سافر واحد يقرب لجارتي لمكة ومنها أفلح السودان والحبشة ونكح ثمه وجاله جهلة وبنات نعمه ...وواحد من الجهلة وعمره تسع سنين جاله عماش في عيونه وهبوله دوا شعبي على قولتهن والدوا ذيه طلع خيبه ولخبس عيونه لا ونه ما يشوف طبعلسة ...وبعدين آبوه عود للديرة وخذ ورقة من الشيخ ووداها للجوازات وهبوا له تابعية
وبغى وجادا في علاج الولد قالوا له الدكاترة الله يخلف عليه في عيونه ..
قنع القحم ودخل ولده معهد النور في مكة ...ونجح الولد من سادسة وكمل المتوسط ووظفوه مدرس قرآن في الابتدائية وقعد يدرس يجي 25سنة ..وبعدين جاء أمر من الحكومة انه العمي اللي ما معاهم إلا متوسط ويدرسون قرآن يتقاعدون بمعاش كامل وتقاعد وهو عنده أسرة وعنده أولاد وبنات وبعضهم نكح وعاد معاهم جهلة وفرح ضعيف معاش كامل وهو سادح باطح.
بعدين أتصل به ولد اخته في الرياض وقال تعال ياخال نقدم لك في مستشفى الملك خالد للعيون عسى الله ياهب لك فراعه وتفتح كما الناس .
أفلح الرياض وكشف عليه الدكتور وقلة إما وحدة من عيونك تمحمحن ولا فيها فايده واما الثانية بنزرع لك فيها قرنية وان شا الله انك تشوف قال لا تاعن واحده ماعليه فالثانية.
المهم نجحن العملية وفتّح الرجال وعاد يشوف ...ولأول مرة في حياته يشوف مرته ويشوف جهلته وجهلتهم ويشوف قرابته واصحابة ...ولا حد جاه في وجهه وحيّا عليه ما يعرفه لين يتهرج يقوم يقله انته فلان ....
سبحان الله العلي العظيم...
الرجال ذحين خايف ويقل لا حد يعلم الوزارة اني فتحت بعدين يردني آدرس وآنا ماكودت أنفك.
قلت والله يخته قصة غريبه سبحان الله باغدي أعلم خياتي فالمنتدى ..


منقول ............

يتبع ..............