فنجال قهوة .. وعزيمة

سلام عليكم

كيف حالكم يا لربع
أشوف المكان ضيق .. الله لا يضيق علينا .. بتتواسعون وتخلوني اقعد معكم وإلا أندر الوادي .. يقلون شي حميصة في بقعة العرعرة تهني بالهنا ..

معي لكم سالفة علمني بها واحد من الزملاء قبل ليلتين .

هاااااااااااااااااااااااااااه اقعد
طيب تواسعوا

طيب ..... لالالالا والله ما تقوم ياريس .. بس حيلوني عن ولد فيصل ما أبي اقعد عنده ..

اسمعوا

يقول الرجال أنعزمنا عند واحد من خارج القبيلة أنا وخوي معي ولبينا الدعوة .. طبعاً الرجال قال الله يحييكم بكرة العشاء عندي ولزّم علينا ..
رحنا ولقينا قدّامنا مجموعة من الرجال ما نعرفهم ..
جلسنا وسولفنا وتعشينا وتهرجنا ..
يقول يوم جينا سارين نقز واحد من الرجاجيل وقال يا الربع بكرة لكم عندي فنجال قهوة ووجه الله لا تقولون لا وتعالوا بعد العصر ومضيفكم يعرف البيت ..
قال خويي تم مكثور الخير..

سرينا وفي الصباح نزلنا السوق نتسيوق وقابلنا واحد من أصحابنا من نفس قبيلة مضيفنا البارح من فترة طويله ما شفناه وأخذنا بالأحضان وحيا الله وسلم الله و قال أنا مدخلي عليكم قولوا ابشر قلنا ابشر . وش تبي حنا حاضرين .. قال الليلة تنعشّا سوى .
قال خويّي اللي وافق مع الرجال البارح تم .. قلت له الليلة معزومين عند الرجال اللي نقز البارح قال الرجال عازمنا لفنجال قهوة وواعدناه بعد العصر .. قلت يابني ادم فنجال القهوة يعني عشا .. قال أنت ما أنت صاحي الرجال يقول فتجال قهوة وتعالوا بعد العصر ..
خلك من الهبال .. بنروح نشرب الدلة وفوقها براد إلى مغرب ونعود نتعشّا ونسمر مع خوينا ..
ماودّي اطيل عليكم .. سكتّ وما عاد عندي هرج .. اسقط في يدي ..
رحنا بعد االعصر لمضيفنا البارح ومشى معنا عند المضيف الجديد ... أنا ماني معاهم يسولفون ويتضاحكون وأنا ما حولك أحد ...... كل تفكيري كيف يتصرّف الثور اللي معي .........( مع إحترامي للثيران ) .
قبل المغرب قال خويّي الله يعقبنا عليك بالخير نستأّذن .. قال وين .. قال إحنا معزومين للعشا عند رجّال ...

اسقط في يد المضيف .. وكأنت ردة فعله أن قال يعني انأ ماني رجّال ..
قال إلا رجال ونعم .. بس قد ارتبطنا مع الرجال اليوم للعشاء .. قال وعزيمتي اللي من البارح وإلا أنا ناقص ..

أنا ساكت .. مضيفنا حق البارح صار وجهه يصفر ويحمّر وموطي رأسه في الأرض ... طبعاً ما عزمنا إلا إحتراماً له وإلا ما يعرفنا من أول ..

طيب .. ( ممكن من اللي قرأ الحكاية يقول لنا لو كان مكان خوي الثور كيف يتصرف ...

تصبحون على خير ..

بعدين أعلمكم وش اللي صار

 

 

الفقه خير من القاله
أنعزمت مره عند ناس 000 من جيراني للعشاء وكان هناك رجلان بالمجلس
ونحن الجيران أربعه فقط والمعزب وولديه ولما قلطنا للعشاء بالمقلط ونحن
واقفين أمام الصحون ذهلت أن هناك خروف كامل على كل صحن وقال المعزب
ونحن واقفين حيالكم الله على واجب فلان وأشار للصحن الأول وكررها مع
تقليط الضيف الثاني للصحن الثاني لا وبعد يقول من غلاكم كثرناكم في توجيه
إعتذار لللضيوف بحضورنا لاوبعد لم يقلط معنا هو وأولاده وتعشينا على كل
صحن ضيف وإثنين من الجيران فقط فبالله عليكم قولولي أليس هذا تبذير
وأزيدكم من الشعر بيت المعزب حارس أمن وراتبه على قده وحاولنا نصحه
وقال والله مايتعالمون الجماعه إني قصرت في حقهم قلنا له خل جماعتك
ينفعونك إذا كثرة ديونك ونرجوك لاعاد تعزمنا بعد كذه وبعدها نقل الأخ زعلان
سأله أحد الجيران عسى ماخلاف قال والله ما أقعد في عماره فيها بخلاء
يحرضوني على جماعتي ولايعزمون ضيفي إذا دعيتهم لمشاركته قلنا
فكينا والتقفوا
شكرا أبا فارس لك تحياتي وتقديري ودمت بووووود0

 

 

هلابك ياأبوفارس
ماتطرحه من مواضيع غاية في الروعة
وجماله أنّه محفزللجميع للتواصل والكتابة
الذاتية .

المواقف كثيرة ولكنها لم تحدث لي
بل نقلاً عن آخرين ومنها :

تخيل أنّك جالس في بيتك وفجأة يأتيك
قريب بعد المغرب مباشرة وترحب به
وتبدأ السوالف وتحس أنّه شارد الذهن
وعند آذان العشاء يبادرك بسؤال :
إنته ماعندك عزيمه اليوم ؟
وتكتشف أنّه يؤكد لك بأنّ إبنك فلان
إتصل به ليلة أمس ليخبره أنّ عندكم
عشاء لفلان القادم من السفر وأكد عليه بالحضور بعد
المغرب مباشرة مع أنّ إبنك يدرس الجامعه
في مدينة أخرى والمحتفى به
لم يأتي لجدة إطلاقاً والإبن لم يكلمه أصلاً
وأنّه مقلب من أحدهم (يتونس) فيه على الضيف.

يقول محدثنا : (حلفت عليه يتعشى وقلت بتسوي
المره خبزه وصدقني ميست آشوفك
طبعاً وافق على مضض وتعشى
وسرى وخاطره مكسور ولا أشره عليه )